Английн Премьер лигт түрүүлсэн "Ливерпүүл" баг ялалтаа тэмдэглэж байх үеэр тус хотын төв хэсэгт нэгэн этгээд автомашинаараа олон нийт рүү дайрч, нийт 27 хүн гэмтсэн ноцтой хэрэг гарсан талаар ВВС мэдээлэв. Гэмтэж бэртэгсдийн дунд дөрвөн хүүхэд байсныг түргэн тусламжийн албаны төлөөлөгч Дэвид Китчен мэдэгдэж, тэднийг яаралтайгаар Ливерпүүлийн эмнэлгүүдэд хүргэсэн байна.
Хэрэг "Ливерпүүл" багийн тоглогчид ялалтын цомоо задгай автобусанд гарган харуулсан ёслолын парадын дараах мөчид гарсан байна. Олон нийтийн бөөгнөрөл тарж эхэлж байсан тэр үед "Форд" маркийн автомашин олны дундуур гэнэт орж иржээ. Мерсисайд гүнлэгийн аврах албаны дарга Ник Серл мэдээлэхдээ, уг үйл явдлын үеэр дөрвөн хүн автомашины дугуйн хооронд хавчуулагдсан хүнд нөхцөл үүссэн хэмээн онцолсон байна.
Цагдаагийн газар уг хэрэгт холбогдуулан 53 настай эрэгтэйг баривчилсан ба Ливерпүүл хотын нэгэн дүүрэгт оршин суудаг уг этгээдийг мөрдөн шалгаж эхэлжээ. Цагдаагийн даргын туслах Женни Симс уг явдлыг террорист халдлага гэж ангилахгүй байгааг мэдэгдсэн ч мөрдөн шалгалт үргэлжилж байна.
Үйл явдлыг гэрчлэхдээ ВВС-гийн нэгэн сэтгүүлч тухайн автомашинд дайруулах дөхсөн тухайгаа ярьжээ. Түүний хэлснээр, хэсэг залуус машин руу цохиж, эд зүйлс шидэж, арын цонхыг нь хагалсан ч жолооч зогсолгүй зугтсан байна.
Их Британийн Ерөнхий сайд Кир Стармер уг үйл явдлыг "аймшигтай" хэмээн тодорхойлж, аврах албаныхны түргэн шуурхай үйл ажиллагаанд талархал илэрхийлсэн бөгөөд гэмтэж бэртсэн иргэдэд хандан гүн эмгэнэл илэрхийлжээ.
Эх сурвалж: ВВС
