АНУ-ын Зэвсэгт хүчний үүргийг "буу тулган" дэлхий дахинд ардчиллыг түгээн дэлгэрүүлэхэд бус харин улс орныхоо хил хязгаарыг хамгаалахад чиглүүлнэ гэж Ерөнхийлөгч Дональд Трамп мэдэгджээ.

“Бид манай зэвсэгт хүчний хамгийн чухал үүрэг болох хил хязгаараа гадны халдлагаас хамгаалах үндсэн зарчмыг сэргээж байна” гэж тэрбээр Нью-Йорк муж улсын Вест-Пойнт хот дахь АНУ-ын Цэргийн академийн төгсөгчдөд хандан үг хэлэхдээ мэдэгдсэн байна. 

Д.Трамп хэлэхдээ, өмнөх удирдагчид армид “нийгмийн төслүүдийг хэрэгжүүлэхэд” анхаарч, “улс орны хил хязгаарыг хамгаалалтгүй орхисон, мөн бусад улсад болж буй дайнд оролцохын тулд зэр зэвсгийн нөөцөө шавхсан” гэж буруутгажээ. “Харин манай засаг захиргааны үед ийм өдрүүд өнгөрөн одсон. Бид зэвсэгт хүчнээ Америкийн дайснуудыг бут цохих, Америкийн дайснуудыг устгах, мөн бидний агуу Америкийн далбааг хамгаалах үндсэн үүрэгт нь шилжүүлж байна” гэж тэрбээр хэлжээ.

“АНУ-ын зэвсэгт хүчний үүрэг бол мансууруулах бодисын шоу зохион байгуулах, гадны соёлыг өөрчлөх эсвэл дэлхий даяар гар буу тулган ардчиллыг түгээх явдал биш юм. Цэргийн үүрэг бол аливаа дайснаас давуу байх, Америкт учирч болох аливаа аюул заналыг хаана ч, ямар ч үед үгүй хийх явдал мөн” гэж Д.Трамп онцолсон байна.

Үүний зэрэгцээ тэрбээр Америкийн арми орчин үеийн цэргийн нөхцөл байдалд дасан зохицох шаардлагатай, тиймээс Орос-Украины дайны туршлагыг судалж байгаа гэдгийг хүлээн зөвшөөрчээ.