Израилийн арми Газын зурваст довтолгоогоо дахин эхлүүлж, дайн арван есөн сарын турш үргэлжилж буй энэ үед нутгийн хүүхдүүд камерын өмнө үл тоомсорлон өнгөрнө. Үхэл, өвчинд нэрвэгдсэн хүмүүсийн дунд өсөж буй хүүхдүүдийг гайхашруулах зүйл бараг үлдсэнгүй.

Тэд өдөр бүр хүнсний тусламжийн багахан хэмжээний тараалт хүлээн цуваанд зогсоно. BBC агентлагийн орон нутгийн зураглаач тэдний хоосон харц, шаналсан уйлаан, нас барагсдыг цагаан даавуунд ороож, нэрийг нь бичиж буй дүр зурагтай өдөр бүр нүүр тулна. Түүний нэрийг аюулгүй байдлын үүднээс нийтлэхгүй.

Тэрбээр энэ удаа Хан Юнус хот дахь Нассер эмнэлэгт зураг авалт хийж байхдаа харсан тавхан сартай охин Сивара Ашурыг эргэн хайхаар гарчээ. Тэр үед Сиварагийн жин дөнгөж 2.1 кг байсан нь тухайн насны хүүхдийн дундаж жингийн талаас бага үзүүлэлт байв.

Сивара одоо эмнэлгээс гарсан бөгөөд эвдэрч сүйдсэн байшингуудын дунд орон гэрээ орлох нэг өрөө түр сууцанд ээж Нажва болон эмээ Риймтэйгээ амьдарч байна. Гэхдээ охины биеийн байдал дахин муудаж байгаа талаар ээж нь мэдээлжээ. Сивар энгийн хүүхдийн сүүг шингээж чаддаггүй учир тусгай зориулалтын сүүн тэжээл хэрэгтэй боловч түүнийг олоход бэрх байна.

"Түүний жинг хянаж, хооллолтыг сайжруулах шаардлагатай. Гэтэл эмнэлгээс өгсөн ганц лааз сүү бараг дууссан. Би охиноо сайжраагүй гэж бодож байна" хэмээн Нажва өгүүлжээ.

Тэрээр мөн тэсрэх бөмбөг, дроны чимээний улмаас охин нь байнга цочиж, нойр нь хямардаг талаар дурдав. Нөхцөл байдлын улмаас Нажва өөрөө ч хангалттай хооллож чадахгүй байгаа нь хөхөөр хооллох боломжийг хаасан гэж үзэж байна. Тэдний хувьд хоол хүнс, сүү, живх худалдан авах боломж бараг үгүй болсон ажээ.

Израилийн тал хүнсний хомсдолгүй, тусламж орж ирж байгаа хэмээн мэдэгдэж буй ч НҮБ болон тусламжийн байгууллагуудын мэдээллээр нөхцөл байдал эсрэгээрээ хүнд байна. НҮБ-ын Ерөнхий нарийн бичгийн дарга Антонио Гутерреш тусламжийн хэмжээг "цайны халбага" хэмээн тодорхойлсон бөгөөд хүн амын 80 хувь нь нүүлгэн шилжүүлэлт эсвэл цэргийн бүсэд амьдарч байгааг дурджээ.

Газын зурваст хоёр сая гаруй иргэн ийм нөхцөлд амьдарч байгаа бөгөөд Сивар охин, түүний гэр бүл тэдний л нэг юм.

Нажва эцэст нь хэлэхдээ: "Ирээдүй, өнгөрсөн хоёрын тухай бодох боломжгүй. Зөвхөн өнөөдрийг яаж даван туулж амьд үлдэх вэ гэдгээ л бодож байна" хэмээн өгүүлэв.

Эх сурвалж: BBC News, нэмэлт мэдээллийг Malak Hassouneh, Alice Doyard, Nik Millard