Умард Солонгосын зүүн нутгийн Чонжин боомтод саяхан болсон шинэ байлдааны хөлөг онгоцыг усанд тавих ёслолын үеэр гарсан ослыг тус улсын эрх баригчид мөрдөн шалгаж эхэлсэн талаар төрийн мэдлийн хэвлэл мэдээллийн хэрэгслүүд өнөөдөр уламжиллаа.
Ослын үеэр 5000 тоннын даацтай байлдааны хөлгийн хэсэг эвдэрч, тэнцвэр алдагдсан бөгөөд удирдагч Ким Жөн Ун уг үйл явдлыг “гэмт хэргийн шинжтэй” гэж шүүмжилжээ. Хэдий тийм боловч Солонгосын төв цахилгаан мэдээний агентлаг (KCNA) хөлгийн ёроолд цоорхой илрээгүй, усан доорх болон доторх үзлэг шалгалтаар ноцтой хохирол тогтоогдоогүй хэмээн мэдээлсэн байна.
Мөрдөн шалгах багийн урьдчилсан дүгнэлтээр, далайн усыг соруулж тэнцвэрийг сэргээхэд хоёр гурван хоног, хөлгийн хажуу хэсгийг бүрэн сэргээхэд арав орчим хоног шаардагдах төлөвтэй байгаа аж. Умард Солонгосын Хөдөлмөрийн намын Цэргийн төв зөвлөл уг явдлыг цэргийн салбар дахь хариуцлагагүй байдалд анхаарал хандуулах дохио гэж үзэж, ослын шалтгаан, буруутай этгээдүүдийг нарийн тогтоохыг үүрэг болгосон байна.
Чонжин усан онгоцны үйлдвэрийн менежер Хон Кил Хог пүрэв гарагт хууль сахиулах байгууллагад дуудагдаж, осолд буруутай байж болзошгүй этгээдүүдийг саатуулан шалгаж эхэлжээ. Ослын үед хөлөг онгоцыг зөв техник ашиглалгүйгээр усанд тавьсан бололтой бөгөөд хөлгийн зарим хэсэг хөмөрсөн хэвээр байгаа талаар Өмнөд Солонгосын зүгээс мэдээлсэн байна.
Пүрэв гарагт уг ослын тухай анх мэдээлсний дараа Умард Солонгос Зүүн тэнгис рүү олон далавчит пуужин харвасан бөгөөд энэ нь тухайн осолтой холбоотой байж болзошгүй гэж ажиглагчид үзэж байна.
Эх сурвалж: Yonhap, KCNA
