Европын Холбоо болон Их Британи улс ОХУ-ын эсрэг шинэ эдийн засгийн хориг арга хэмжээ авахаар болсноо хамтран зарлалаа. Тэдний зүгээс АНУ-ын шийдвэрийг хүлээх шаардлагагүй гэж үзсэн бөгөөд аль болох хурдан, бие даан шийдвэрлэх нь зүйтэй хэмээн байр сууриа илэрхийлсэн байна.

Шинэ хориг арга хэмжээ нь ОХУ-ын “сүүдрийн флот” хэмээн нэрлэгддэг, хяналтаас гадуур газрын тос тээвэрлэдэг хөлөг онгоцуудад чиглэж байгаа аж. Мөн хориг нь Оросын эдийн засгийн тогтворгүй байдлыг зөөлрүүлэхэд дэмжлэг үзүүлж буй санхүүгийн фирмүүдийг хамарна. Украин дахь дайныг зогсоох оролдлогын хүрээнд авч буй энэ алхмыг Украины Ерөнхийлөгч Володимир Зеленский сайшаан хүлээн авч, АНУ ч нэмэгдэн оролцвол сайн хэмээн найдаж буйгаа илэрхийлжээ.

Германы гадаад хэргийн сайд Иоханн Вадефул Европын талуудын зорилгыг тодорхой илэрхийлсэн нь “ОХУ ямар ч нөхцөлгүйгээр даруй гал зогсоох”-ыг шаардаж байгаа явдал юм. Гэвч ОХУ энэ шаардлагыг үл хүлээн зөвшөөрч байгаагаас шалтгаалан Европын тал арга хэмжээ авахад хүрсэн байна.

АНУ-ын хувьд одоогоор тодорхой байр суурь илэрхийлээгүй бөгөөд Европын энэ шинэ алхмыг ажиглаж байгаа гэсэн мэдэгдэл хийжээ. Харин даваа гарагт АНУ-ын Ерөнхийлөгч Дональд Трамп болон ОХУ-ын Ерөнхийлөгч Владимир Путин нар утсаар ярилцсан бөгөөд уг ярианы үеэр эдийн засгийн хориг болон гал зогсоох талаар шууд хэлэлцээгүй гэдгийг албаны хүмүүс онцолсон байна.

Трамп өмнө нь нөхцөлгүйгээр 30 хоногийн гал зогсоох шаардлага тавьж байсан ч энэ удаагийн ярианд уг шаардлагаа зөөлрүүлж, Украин дахь дайныг богино хугацаанд зогсооно гэсэн сонгуулийн үеийн амлалтаа хэрээс хэтэрсэн байсныг хүлээн зөвшөөрсөн байна. Мөн тэрээр ОХУ-ын эсрэг хориг арга хэмжээ авах нь нөхцөл байдлыг улам хүндрүүлж болзошгүй хэмээн болгоомжилж байгаагаа илэрхийлжээ.

Эх сурвалж: DW, BBC, Euronews