Энэ зун Японы нийслэл Токио хотын захиргаа оршин суугчдаа хэт халуун өдрүүдээс хамгаалахын тулд усны хэрэглээний суурь хураамжаас дөрвөн сарын хугацаанд чөлөөлөх шийдвэр гаргалаа. Уг арга хэмжээг хэрэгжүүлэхэд нийт 36 тэрбум иен (ойролцоогоор 250 сая ам.доллар)-ыг төсвөөс зарцуулах бөгөөд оршин суугчид сард дунджаар 6–10 ам.долларын хөнгөлөлт эдлэх юм.
Токиогийн захирагч Юрико Коикэ энэ талаар мэдэгдэхдээ “Энэ зун хэт халуун болох төлөвтэй тул, хүмүүсийг агааржуулагч болон хөргөлтийн бусад аргыг ашиглахад дэмжлэг үзүүлэх нь зайлшгүй шаардлагатай” гэжээ. Түүний онцолсноор, өнгөрсөн зун 263 хүн халуунд цохиулан нас барсан бөгөөд олонх нь агааржуулагчгүй, эсвэл төлбөрийн дарамтаас үүдэн түүнийг ашиглаагүй байсан байна.
Токио хотын 7 сая гаруй өрх, 14 сая гаруй хүн ам энэ дэмжлэгт хамрагдах бөгөөд усны суурь хураамж нь ус дамжуулах хоолойн өргөнөөс шалтгаалан сард 860-1460 иен буюу 6–10 ам.долларын хооронд байдаг байна.
Японы Цаг уурын агентлагийн мэдээлснээр, 2023 он нь түүхэнд байгаагүй хамгийн халуун зун тохиосон жил болж, 6–8 дугаар сарын хоорондох температур 1991–2020 оны дунджаас 1.76 хэмээр давсан. Харин 6–9 дүгээр сард Токиод 8000 орчим хүн хэт халуунаас болж эмнэлэгт хүргэгдсэн нь өмнө нь тохиолдож байгаагүй үзэгдэл болж бүртгэгджээ.
Энэхүү шийдвэр нь Токио хотын оршин суугчдын эрүүл мэнд, амьдралын чанарыг хамгаалахад чиглэсэн бөгөөд эдийн засгийн дарамт бууруулах замаар хэт халууны эсрэг үр дүнтэй алхам болохоор хүлээгдэж байна.
Эх сурвалж: BBC
