Их Британи улс Газын зурваст хүмүүнлэгийн тусламж нэвтрүүлэхэд саад учруулж, энгийн иргэдийг бүслэн, өлсгөлөнд хүргэж байгаа Израилын үйлдлийг хариуцлагажуулахын тулд хоёр талын чөлөөт худалдааны хэлэлцээг түр зогсоох шийдвэр гаргалаа. Энэ талаар Их Британийн Гадаад хэргийн сайд Дэвид Лэмми парламентын Доод танхимд мягмар гарагт мэдэгдсэн байна.

Тэрбээр “Бид энэ нөхцөл байдлыг зүгээр хараад сууж болохгүй. Энэ нь хоёр орны хамтын ажиллагааны үндэс болсон зарчим, үнэт зүйлстэй нийцэхгүй” хэмээн онцолсон байна. Израилын Газын зурваст авсан арга хэмжээнүүдийг тэрээр хүнлэг бус, олон улсын хуульд харш гэж үзсэн бөгөөд чөлөөт худалдааны хэлэлцээг цааш үргэлжлүүлэх боломжгүй гэж мэдэгдэв.

Энэ шийдвэр нь палестин иргэдийн эсрэг хүчирхийллийг дэмжигч гурван хувь хүн, хууль бус хоёр харуулын цэг, хоёр байгууллагад хориг арга хэмжээ авах багцын хүрээнд зарлагдсан юм. Израилаас Их Британид суугаа Элчин сайдыг Гадаад хэргийн яаманд дуудаж, нөхцөл байдлын талаар тайлбар өгөхийг шаардсан байна.

Их Британи болон Израил хоёр 2022 оноос чөлөөт худалдааны гэрээг шинэчлэх хэлэлцээ хийж эхэлсэн бөгөөд хамгийн сүүлд 2024 оны дөрөвдүгээр сард тав дахь шатны уулзалт болсон. Энэ оны долоодугаар сард шинэ Засгийн газар хэлэлцээг үргэлжлүүлэх шийдвэр гаргасан ч нөхцөл байдал өөрчлөгдсөнтэй холбоотойгоор ийнхүү түр зогсоожээ.

Эх сурвалж: Politico