Сүүлийн үед криптовалютын бизнес эрхлэгчид болон хөрөнгө оруулагчид руу чиглэсэн зэвсэгт халдлага, барьцаалах гэмт хэрэг олон улсад эрчимтэй нэмэгдэж байгаа талаар олон улсын хэвлэлүүд онцолж байна. Цахим мөнгөний үнэ өсч, энэ салбар дахь хөрөнгийн эргэлт тэрбум тэрбумаар хэмжигдэх болсон нь ийм төрлийн гэмт хэрэгтнүүдийн анхаарлыг татах болжээ. Үүн дээр нэмэгдээд хувь хүмүүсийн мэдээлэл, хаяг, байршил зэрэг чухал мэдээллүүд интернетээр алдагдаж байгаа нь эрсдэлийг улам ихэсгэж байна гэж шинжээчид анхааруулж байна.
Wall Street Journal сонинд бичсэнээр, Франц улсад Paymium криптовалютын биржийн эмэгтэй захирлыг зэвсгээр сүрдүүлж, охиныг нь хулгайлах оролдлого гарчээ. Энэ хэрэг нь ганц тохиолдол биш бөгөөд сүүлийн жилүүдэд АНУ, Франц, Австрали зэрэг улсуудад крипто салбарт нөлөө бүхий блогчид, хөрөнгө оруулагчид хүчирхийлэл, дарамтад өртсөн хэд хэдэн тохиолдол бүртгэгдсэн байна. Зарим нь гэртээ халдлагад өртөж, зодуулж, эрхтэн дархтныг нь хулгайлах оролдлого ч гарсан хэмээн мэдээлжээ.
Мөн АНУ-д байрладаг Coinbase биржийн зарим хэрэглэгчийн мэдээлэл кибер халдлагад өртөж, уг мэдээллийг ашиглан гэмт бүлэглэл 20 сая ам.доллар нэхэмжилсэн хэрэг гарсан талаар хэвлэлүүд мэдээлсэн байна. Ийнхүү криптовалютын орчинд ажиллаж буй хүмүүсийн аюулгүй байдал, мэдээлэл хамгаалалт олон улсын түвшинд ноцтой асуудал болон хувирчээ.
Эх сурвалж: Wall Street Journal
