Аймгийн Засаг даргын үйл ажиллагааны хөтөлбөрийн 3.4.1-д тусгасан “Аялал жуулчлалын менежмент, удирдлага, зохион байгуулалтыг оновчтой болгож, төр-хувийн хэвшлийн түншлэлийг бэхжүүлнэ” гэсэн зорилтын хүрээнд Архангай аймаг анх удаа хиймэл оюун ухаанд суурилсан E-Guide цахим системийг нэвтрүүлэхээр боллоо.

E-Guide.mn хаягаар ажиллах энэхүү цахим сайт нь Монгол Улсын хэмжээнд аялал жуулчлалын чиглэлээр үйл ажиллагаа явуулж буй бүхий л төрлийн үйлчилгээний мэдээллийг нэг дор багтаасан, хялбар ашиглалттай, орчин үеийн дижитал платформ байх юм. Энэхүү систем нь жуулчдад зориулсан мэдээллийг 38 орны хэл дээр аудио болон бичгээр авах боломжийг олгож, хэлний хүндрэлгүй аяллыг дэмжинэ гэдгээрээ онцлогтой.

Архангай аймаг E-Guide системээр дамжуулан нутгийнхаа аялал жуулчлалын маршрут, байгалийн болон түүхэн дурсгалт газар, рашаан сувилал, амралтын газар, жуулчны бааз, зочид буудал, ресторан, малчин кемп зэрэг бүхий л аялал жуулчлалын бүтээгдэхүүн, үйлчилгээний мэдээллийг нэгтгэж оруулсан байна. Энэ нь орон нутгийн аялал жуулчлалын хөгжилд шинэ түвшний дижитал дэмжлэг болж, дотоод болон гадаад жуулчдын урсгалыг нэмэгдүүлэх, орон нутгийн эдийн засагт эерэг нөлөө үзүүлэх хүлээлттэй байна.

Эх сурвалж: Архангай аймгийн Засаг даргын Тамгын газар