Хятадын технологийн салбарт шинэ үе эхлүүлж буй үйл явдал энэ долоо хоногт боллоо. “Huawei” компани өөрсдийн зохион бүтээсэн “HarmonyOS” үйлдлийн систем бүхий анхны компьютероо Сычуань мужийн Чэндү хотод болсон арга хэмжээний үеэр олон нийтэд танилцуулсан тухай “Global Times” мэдээлжээ.

“HarmonyOS” систем нь өндөр хүчин чадал бүхий, хялбар ажиллагаатайгаараа онцлогтой. Компьютер 100 хуудастай “PowerPoint” файлыг нэг секундэд нээх чадвартай бөгөөд олон төрлийн аппликейшнийг зэрэг ажиллуулах чадамжтай юм. Мөн хиймэл оюун ухаан, ухаалаг функцуудыг нэвтрүүлсэн нь хэрэглэгчдэд илүү ойлгомжтой, үр ашигтай орчинг бүрдүүлж өгчээ.

Энэхүү төслийг бүтээхэд таван жилийн хугацаанд 10 мянга гаруй инженер, 20 эрдэм шинжилгээний хүрээлэн хамтран ажиллаж, нийт 2700 гаруй патентыг бүртгүүлсэн байна. Үүнтэй зэрэгцэн “Huawei” дэлхий дээрх хамгийн том хэмжээтэй, эвхэгддэг дэлгэцтэй арилжааны компьютер болох 18 инчийн “MateBook Fold”-ыг мөн танилцуулсан нь онцлох үйл явдлын нэг байлаа.

Энэхүү компьютерын танилцуулга нь Хятадын дотоодын технологийн хангамжийг бэхжүүлэх, гадаад хамаарлыг бууруулах зорилготой үйлдлийн системийг хөгжүүлэх алхамд чухал нөлөө үзүүлэх төлөвтэй байна.

Эх сурвалж: Anadolu, Global Times