Израилийн засгийн газар 11 долоо хоногийн хоригийн дараа НҮБ-ын таван ачааны машин хүнсний тусламж, тэр дундаа нярай хүүхдийн хүнс тээвэрлэн Газарын зурвас руу ороход зөвшөөрсөн тухай мэдээлэв. Энэхүү алхамыг дэлхий нийтийн санаа зовнил, АНУ-ын Сенат дахь холбоотнуудын шахалтын дараа Ерөнхий сайд Бенжамин Нетаньяху зөвшөөрсөн бөгөөд тэрбээр “өлсгөлөнд хүргэхгүй байх нь бодит болон дипломат ач холбогдолтой” хэмээн онцолжээ.

НҮБ-ын хүмүүнлэгийн асуудал хариуцсан дарга энэ шийдвэрийг сайшаасан ч "өнөөгийн байдалд 2.1 сая палестинчуудын хувьд энэ нь далайд дусал мэт өчүүхэн" гэж мэдэгдлээ. Тус бүс нутагт өлсгөлөн нүүрлэх аюул тулгараад байгааг олон улсын судлаачид удаа дараа анхааруулсаар буй.

Нетаньяху энэхүү хүнсний тусламжийг зөвхөн Израилийн армийн хяналтад, хувийн компанийн хамтаар АНУ-ын дэмжлэгтэй логистикийн төв байгуулагдтал үргэлжлүүлнэ гэж мэдэгдэв. Харин энэхүү төлөвлөгөөг НҮБ хүлээн зөвшөөрөхөөс татгалзсан байна.

Израилийн зүгээс мөн Ням гарагт эхлүүлсэн Газ дахь газар дээрх довтолгоогоо өргөжүүлж, “Газа дахь бүх бүсийг хяналтдаа авна” гэж мэдэгдээд байна.

Энэ хооронд Израилийн агаараас хийсэн дайралтууд даваа гарагт л гэхэд Газын зурвасын хэмжээнд дор хаяж 40 хүний аминд хүрчээ. Нусейратын дүрвэгсдийн хуаранд байрлаж байсан сургууль дээрх дайралтад таван хүн амь үрэгдсэн бол Израилийн армийн мэдээлснээр уг газарт Хамасын командын төв байрлаж байсан аж.

Израилийн тал мөн Хан Юнис хот болон түүний зүүн захын оршин суугчдыг яаралтай нүүлгэн шилжихийг анхааруулж, “өнөөг хүртэлх хамгийн хүчтэй цохилт” хийхээ мэдэгджээ.

Эх сурвалж: BBC, Al Jazeera, UN OCHA