АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путинтэй хоёр цаг утсаар ярьсны дараа Орос, Украин хоёр гал зогсоох болон дайн дуусгах хэлэлцээг "шууд эхлүүлнэ" гэж мэдэгдлээ. Тэрбээр энэ яриа “маш сайн” болсон хэмээн тэмдэглэж, энхийн нөхцлийг хоёр тал хоорондоо тохиролцох ёстой гэсэн байр суурийг илэрхийлсэн байна.

Хэдий тийм ч, одоогоор энхийн хэлэлцээ яг хэзээ эхлэх нь тодорхойгүй бөгөөд АНУ болон Европын орнуудын зүгээс шаардсан 30 хоногийн болзолгүй гал зогсоох тухай асуудалд Оросын Ерөнхийлөгч Путин тодорхой хариу өгөөгүй хэвээр байна.

Украины Ерөнхийлөгч Володимир Зеленский Трамптай хоёр дахь удаагаа ярьсан бөгөөд тэрбээр “бүтэн, болзолгүй гал зогсоохыг” хүсэж буйгаа дахин онцлоод, хэрэв Москва бэлэн биш бол Орост илүү хүчтэй хориг тавих хэрэгтэй гэж мэдэгджээ. Мөн тэрбээр Украинтай холбоотой ямар ч шийдвэрийг өөрсдөөс нь гадуур гаргаж болохгүй гэдгийг дахин сануулсан юм.

Путин Трамптай хийсэн утасны яриагаа “шударга, мэдээлэлтэй, бүтээлч” байсан гэж тодорхойлсон бөгөөд "ирээдүйн энхийн хэлэлцээрийн тухай санамж бичиг боловсруулахад Орос бэлэн" гэж мэдэгдсэн байна. Энэ нь боломжтой гал зогсоох хугацаа, нөхцөлүүдийг багтаасан байж магадгүй аж.

Зеленский хэлэлцээ нь АНУ, Европын холбооны төлөөлөгчдийн оролцоотой явагдах ёстой гэсэн байр суурь илэрхийлсэн бол Европын Комиссын Ерөнхийлөгч Урсула фон дер Лайен “АНУ энэ үйл явцаас хөндийрч болохгүй” гэдгийг онцлон дурдсан байна.

Энэ утасны ярианы дараа болсон Европын удирдагчдын хамтарсан цахим уулзалтад Италийн Ерөнхий сайд Жоржиа Мелони, Франц, Герман, Финландын удирдагчид оролцож, Ватикан энхийн хэлэлцээ хийх газар болж магадгүй гэсэн саналыг нааштайгаар хүлээн авчээ.

Түүнчлэн, ОХУ-Украины хооронд гурав гаруй жилийн дараах анхны шууд уулзалт саяхан болж, олзлогдогсдыг солилцох тохиролцоонд хүрсэн ч гал зогсоох асуудалд нэг ч алхам урагшилсангүй. Орос улс өмнө нь түр хугацааны гал зогсоох зарласан ч байнгын тохиролцоонд хүрээгүй, Украины зүгээс “итгэх аргагүй” гэж мэдэгдсээр ирсэн юм.

Эх сурвалж: Reuters, Truth Social, White House Briefing, Ukrainian Presidential Office