АНУ-ын Калифорни мужийн Палм Спрингс хотод орших үр тогтоох эмнэлгийн ойролцоо гарсан автомашины дэлбэрэлтийг Холбооны мөрдөх товчоо “террорист халдлага” гэж тодорхойллоо. Дэлбэрэлт 11 цагийн орчимд (орон нутгийн цагаар) болсон бөгөөд дэлбэрэлтийн улмаас сэжигтэн нас барж, дөрвөн хүн шархадсан байна. Шархадсан хүмүүсийг эмнэлэгт хүргэж эмчилгээ хийсний дараа гаргасан бөгөөд одоогоор дахин аюул учрах эрсдэлгүй хэмээн албаныхан мэдэгджээ.
Холбооны мөрдөх товчооноос мэдээлснээр халдлагын сэжигтнээр 25 настай Гай Эдвард Барткус тодроод байна. Тэрбээр халдлага үйлдэх үедээ “амьдралын утга учир үгүй” гэх nihilistic үзэл санаатай байсан бөгөөд өөрийн бэлтгэсэн тэсрэх бөмбөгийг үр тогтоох эмнэлгийн ойролцоо дэлбэлж, халдлагыг шууд дамжуулахыг оролдсон байна. Гэвч дамжуулалт хэр амжилттай болсон эсэх нь одоогоор тодорхойгүй байгаа бөгөөд түүний хөдөлгөөнийг дэлбэрэлтээс өмнө хаана явсан болохыг мөрдөн шалгаж байна.
Халдлага зориуд IVF төвийг онилсон байв
Дэлбэрэлт хотын төвөөс нэг километр хүрэхгүй зайд орших American Reproductive Centers (ARC) үр тогтоох төвийн гадна талын зогсоолд болсон байна. Эмнэлгийн удирдлагын хэлснээр ямар нэгэн эмч, ажилтан, өвчтөнд хохирол учраагүй. Харин эмнэлгийн оффисын хэсэг хүнд гэмтсэн байна. Аз болоход тухайн өдөр үйлчлүүлэгч хүлээж авч байгаагүй өдөр таарсан тухай эмнэлгийн удирдагч доктор Махер Абдалла дурдсан байна.
Дэлбэрэлтэд ашиглагдсан машин нь 2010 оны мөнгөлөг өнгийн Ford Fusion байсан бөгөөд тэсрэх хэрэгслийг тус машинд байрлуулсан гэж үзэж байна. Дэлбэрэлт асар хүчтэй байсан тул ойролцоох хэд хэдэн барилга гэмтэж, зарим хэсэг нь бүрэн нуржээ. Дэлбэрэлтийн улмаас үүссэн хохирлыг газрын 100 фут орчим талбайд бүртгэж байгаа бөгөөд тус мөрдлөг нь өмнөд Калифорнийн сүүлийн жилүүдийн хамгийн том тэсрэх хэрэгт тооцогдож байна.
Сэжигтний талаарх дэлгэрэнгүй
Барткус нь Палм Спрингс хотоос ойролцоогоор нэг цагийн зайд орших Twentynine Palms хотын оршин суугч байсан бөгөөд тус газар АНУ-ын тэнгисийн цэргийн томоохон бааз байрладаг. Түүний гэрт нэгжлэг хийсэн бөгөөд ойролцоох оршин суугчдыг аюулгүй байдлын үүднээс түр нүүлгэн шилжүүлжээ. Мөрдөгчид одоогоор сэжигтэнтэй холбоотой байж болзошгүй манифест баримтыг шалгаж байна.
ARC төвийн мэдээлснээр лабораторийн бүх өндгөн эс болон үр тогтоосон үр хөврөлүүд бүрэн бүтэн, аюулгүй байгаа ажээ. Уг төв нь Коачелла хөндийн анхны иж бүрэн IVF лаборатори бөгөөд үр тогтоох үзлэг, өндгөн эс хандив, хөлдөөх, ижил хүйстэн хосууд болон орлон төрүүлэх үйлчилгээ үзүүлдэг байгууллага юм.
Эх сурвалж: BBC, CBS News, Associated Press
