АНУ-ын ерөнхийлөгч асан Жо Байденд түрүү булчирхайн хорт хавдрын хожуу шат оношлогдсон тухай түүний албанаас Ням гарагт мэдэгдлээ. Оношлогоогоор хавдар ясанд тархсан бөгөөд "дээд зэргийн хүнд хэлбэрийн", түргэн тархах магадлалтай хэмээн тодорхойлжээ. Хорт хавдрын түвшин нь Глисон оноогоор 9/10 гэж үнэлэгдсэн байна.

Байден өнгөрсөн долоо хоногт шээсний шинж тэмдгийн улмаас эмнэлэгт хандсаны дараа энэ хавдрыг илрүүлжээ. Түүний гэр бүл одоогоор эмчилгээний сонголтыг авч үзэж байгаа бөгөөд хавдар нь даавраас хамааралтай шинжтэй тул эмчилгээний үр дүн гарч болзошгүй гэж үзэж байна.

Улс төрийн хүрээний дэмжлэг

Түүний өвчний талаарх мэдээлэл ил болсны дараа улс төрийн хүрээнийхнээс өрсөлдөгч, нөхөд гэлтгүй олон хүн дэмжиж буйгаа илэрхийллээ. Ерөнхийлөгч Дональд Трамп “Жо Байдены оношлогдсон мэдээг сонсоод гүнээ эмгэнэж байна. Жилл болон гэр бүлийнхэнд нь халуун сэтгэлийн мэндчилгээ илгээж, хурдан эдгэрэхийг хүсье” хэмээн өөрийн платформоор дамжуулан бичжээ.

Мөн дэд ерөнхийлөгч асан Камала Харрис “Жо бол тэмцэгч хүн. Тэр энэ сорилтыг тэвчээр, өөдрөг сэтгэлээр туулна гэдэгт би итгэлтэй байна” хэмээн бичжээ.

Сонгууль, нас, эрүүл мэндийн асуудал

Жо Байден 2024 оны АНУ-ын ерөнхийлөгчийн сонгуульд дахин нэр дэвшихээ эрүүл мэнд болон насны шалтгаанаар өнгөрсөн жил больсон. Тэрээр Америкийн түүхэнд ерөнхийлөгчөөр ажилласан хамгийн өндөр настай хүн бөгөөд өнгөрсөн зургадугаар сард Дональд Трамптай хийсэн телевизийн мэтгэлцээнд хангалтгүй оролцсон нь олон нийтийн шүүмжлэлд өртсөн. Үүний дараагаар Камала Харрис түүний оронд Ардчилсан намаас нэр дэвшсэн юм.

Тэрбээр олон жил хорт хавдрын судалгааг дэмжиж ирсэн

Байден хүүгээ тархины хорт хавдраар алдсанаас хойш хавдрын эсрэг тэмцлийг чухалчлан авч үзсээр ирсэн. 2022 онд тэрээр эхнэр Жилл Байдены хамтаар “Cancer Moonshot” санаачилгыг дахин эхлүүлж, 2047 он гэхэд дөрвөн сая хүнийг хавдрын нас баралтаас аврах зорилт тавьсан.

Эмч нарын байр суурь

Америкийн Хавдар судлалын нийгэмлэгийн Ерөнхий шинжлэх ухааны захирал, түрүү булчирхайн хорт хавдрын эмч доктор Уильям Дахутын хэлснээр Байденд оношлогдсон хэлбэр нь илүү түргэн явцтай, ясанд тархсан тохиолдолд бүрэн эдгэрэх боломж бага гэж үздэг ч олон хүн эхний шатны эмчилгээнд эерэг хариу үзүүлдэг гэлээ. Эмчилгээнд ихэвчлэн дааврын эсрэг эмчилгээ хэрэглэдэг байна.

Одоогоор Байден олон нийтийн өмнө бараг гардаггүй болсон бөгөөд сүүлийн удаа дөрөвдүгээр сард хөгжлийн бэрхшээлтэй иргэдийн төлөөх байгууллагын хурал дээр үг хэлжээ. Түүнчлэн ВВС-д тавдугаар сард өгсөн ярилцлагадаа “2024 оны сонгуулиас нэрээ татах шийдвэр амар байгаагүй” гэжээ.

Эх сурвалж: BBC, Cancer Research UK, Cleveland Clinic, CDC.