Тайландын нийслэл Бангкок хотод газар хөдлөлтийн улмаас нурсан 30 давхар барилгын хэрэгт холбогдуулан нийт 17 хүнд баривчлах шийдвэрийг шүүхээс гаргасан байна. Тус барилга нь Төрийн аудитын газрын шинэ байр болохоор төлөвлөгдсөн байсан бөгөөд Мьянмарт энэ оны гуравдугаар сарын 28-нд болсон 7.7 магнитудын хүчтэй газар хөдлөлтийн чичиргээ Бангкокт мэдрэгдсэний дараа нуржээ.

Эрх баригчид өнөөдрийн байдлаар нурангинаас 89 хүний цогцсыг гаргаж авсан бол долоон хүн сураггүй хэвээр байгаа гэж мэдэгдлээ. Нуралт болох үед барилгын талбайд 400 гаруй ажилтан ажиллаж байсан бөгөөд аврах ажиллагаанд нисгэгчгүй дрон, үнэрч нохой, кран, экскаваторуудыг дайчилсан байна.

Цагдаагийн байгууллагаас өгсөн мэдээллээр уг шийдвэрүүд нь барилгын зураг төсөл гаргасан, барьсан, барилгын ажлыг хянан удирдсан хүмүүст хамаарч байгаа аж. Хэвлэлүүдийн мэдээлснээр одоогоор нэр дурдагдсан ганц хүн нь Италийн хөрөнгө оруулалттай, Тайландын хамгийн том барилгын компаниудын нэг болох Italian-Thai Development компанийн ерөнхийлөгч асан Прэмчай Карнасута юм.

Мөн Тайландын дотоодын хэвлэлүүд тус барилгын цахилгаан шатны хонгилд бүтэц, хийцийн доголдол илэрсэн талаар мэдээлжээ. Гэсэн ч эрх баригчид барилгын нурангийн шалтгааныг албан ёсоор дүгнэн нийтэд зарлаагүй байна.

Нийслэл Бангкок дахь бусад барилгууд газар хөдлөлтийн чичиргээнд өртсөн ч ноцтой хохирол амсаагүй. Харин аялал жуулчлалын гол бүс болох Чатучак захын эсрэг талд байрлалтай, цэнхэр шил, ган хийцтэй энэхүү 30 давхар барилга гурав орчим жилийн турш баригдаж байсан бөгөөд нийт зардал нь хоёр тэрбум тай бат буюу ойролцоогоор 59 сая ам.доллар хүрээд байжээ.

Газар хөдлөлт болсон өдөр буюу гуравдугаар сарын 28-нд Мьянмарт 3,000 гаруй хүн амиа алдаж, 4,500 гаруй хүн гэмтэж бэртсэн байна. Энэхүү хүчтэй газар хөдлөлтийн чичиргээ Тайланд, өмнөд Хятадын хэсгүүдэд мэдрэгдсэн юм.

Эх сурвалж: BBC News