АНУ-ын Төрийн департаментын өндөр албан тушаалтан, сенатор Марко Рубио Украин, Оросын энхийн хэлэлцээр Туркт болох чухал уулзалт болно гэдэгт өндөр найдлага тавихгүй байгаагаа мэдэгдлээ. Тэрээр уг асуудлаар ахиц гаргахын тулд Дональд Трамп, Владимир Путин нар биечлэн уулзах шаардлагатай гэж үзэж байна.

“Ерөнхийлөгч Трамп, ерөнхийлөгч Путин хоёр энэ асуудлаар шууд харилцан уулзах хүртэл ямар нэгэн ахиц гарна гэж би бодохгүй байна” хэмээн тэрээр Туркийн өмнөд хэсэгт болсон НАТО-гийн Гадаад хэргийн сайд нарын уулзалтын дараа хэлжээ.

Украины ерөнхийлөгч Володимир Зеленский тус улс төлөөлөгчдөө Истанбул руу явуулахаа баталсан ч Оросын тал хэлэлцээрийг нухацтай авч үзэхгүй байна хэмээн шүүмжилсэн байна.

Тэрбээр Анкара хотноо сэтгүүлчдэд хандан, Оросын төлөөлөгчдийг “доод түвшний” гэж дүгнэжээ. Харин Оросын төлөөлөгчдийн тэргүүн, ерөнхийлөгчийн туслах Владимир Мединский Кремлийн баг шаардлагатай бүх мэдлэг, чадвартай гэж мэдэгдсэн байна.

Өдрийн эхэнд Ойрхи Дорнодод айлчилж буй Дональд Трамп ч мөн энхийн яриа хэлэлцээ ахихын тулд Путинтэй биечлэн уулзах шаардлагатай гэж хэлсэн юм.

BBC агентлагийн сурвалжлагч Air Force One онгоцонд түүнээс Оросын төлөөлөгчдийн түвшний талаар асуухад Трамп “Путин бид хоёр уулзах хүртэл юу ч болохгүй” хэмээн хариулжээ.

“Тэр намайг очихгүй бол ирэхгүй. Та дуртай байсан ч, үгүй байсан ч, бид хоёр уулзахгүй л бол юу ч болохгүй. Гэхдээ бид энэ асуудлыг шийдэх л болно. Учир нь хэт олон хүн амь үрэгдэж байна” гэж Трамп нэмж хэлжээ.

Тэрбээр хэрэв “тохиромжтой” байвал Баасан гарагт Турк дэх хэлэлцээрт оролцоно гэж мэдэгдсэн ч дараа нь Вашингтонд буцаж магадгүй хэмээв.

АНУ, Турк, Украин, Оросын төлөөлөгчид энэ Пүрэв гарагт Истанбул хотод 2022 оноос хойших анхны нүүр тулсан хэлэлцээрийг хийхээр төлөвлөж байсан ч оройн байдлаар тов гаргаагүй байв. Зарим эх сурвалжийн мэдээлж буйгаар уулзалт Баасан гарагт болох магадлалтай байна.

Эх сурвалж: BBC News