АНУ-ын Ерөнхийлөгч Дональд Трамп хоёр дахь бүрэн эрхийнхээ анхны гадаад айлчлалыг Персийн булангийн орнуудад хийж байгаа нь олон улсын анхаарлыг татлаа. Саудын Араб, Катар, АНЭ-д дөрөв хоногийн хугацаатай хийх уг айлчлал аюулгүй байдлын асуудал бус зөвхөн эдийн засгийн гэрээ, хөрөнгө оруулалтын хэлэлцээрт төвлөрч байгаа нь хэвлэлүүдийн нийтлэг анхаарал хандуулсан сэдэв болж байна.

The New York Times: Саудын Араб Трампыг онцгойлон угтлаа

АНУ-ын ерөнхийлөгчийг хаан ширээ залгамжлагч Мухаммед бин Салман хувиараа онгоцны буудал дээр угтан авсан нь Трамп Саудын Арабт тусгай статустай хүн гэдгийг илтгэж байна хэмээн онцолжээ. Энэ нь Жо Байдентай харьцуулбал тод ялгаатай гэж дурдсан байна. Трамп $1 их наядын хэмжээ бүхий гэрээ байгуулах зорилготой бөгөөд зохиомол оюун ухаан, эрчим хүч, зэвсгийн худалдаа зэрэг салбарыг хамарч байгаа аж.

Reuters: Трампын айлчлал эдийн засагт л чиглэнэ

Трампын айлчлалын гол агуулга аюулгүй байдал бус, эдийн засгийн ашиг сонирхолд чиглэж байна. Тэрбээр Илон Маск зэрэг бизнесийн лидерүүдтэй хамт хөрөнгө оруулалтын чуулга уулзалтад оролцохоор төлөвлөсөн бөгөөд Израилиар дайрахгүй гэдэг нь Вашингтон-Тель-Авивийн харилцаанд өөрчлөлт гарсны илрэл гэж тайлбарлажээ.

Bloomberg: Саудын эдийн засаг Трамптай наймаа хийхэд тулгуурлаж байна

Нефтийн үнэ унаснаас болж Саудын эдийн засаг хүнд байдалд орж, $30 тэрбумын өртэй болоод байгаа тул ханхүү Мухаммед Трамптай олон арван гэрээ хэлэлцээр байгуулж, хөрөнгө оруулалт татах шаардлагатай гэж бичжээ. Ханхүү мөн Трампын энхийн санаачилгыг дэмжинэ гэж амласан бөгөөд энэ нь Украин, Газа, Ираны асуудлыг багтааж байгаа аж.

CNN: АНУ АНЭ-д $1.4 тэрбумын зэвсэг борлуулна

Трамп АНЭ-д айлчлах үеэрээ Chinook нисдэг тэрэг, F-16 онгоцны сэлбэг багтсан $1.4 тэрбумын зэвсгийн гэрээ байгуулсан тухай CNN мэдээлжээ. Түүнчлэн Эмират улс АНУ-д 10 жилийн турш $1.4 их наядын хөрөнгө оруулалт хийхээр амласан байна. Санамж бичгүүд нь хагас дамжуулалт, эрчим хүч, зохиомол оюун ухаан зэрэг салбарыг хамарчээ.

Гэсэн хэдий ч АНЭ-д зэвсэг нийлүүлэхийг эсэргүүцсэн ардчилагч сенатор Крис Мерфи "Трампын криптовалютын үйлдвэрт Эмиратын хөрөнгө оруулагчид $2 тэрбумын хөрөнгө оруулсан нь зэвсгийн наймаатай холбоотой ашиг сонирхлын зөрчил байж болзошгүй" гэж шүүмжилжээ.

NBC News: Катар Трампт тансаг онгоц бэлэглэх саналтай

Катарын хааны гэр бүл Трампт люкс ангиллын онгоц бэлэглэхээр санал тавьсан нь АНУ-ын дотоодын шүүмжлэлд өртөж болзошгүй байна. Трамп үүнд татгалзахгүй гэж мэдэгдээд, онгоцыг ирээдүйд ерөнхийлөгчийн номын сангийн үзмэр болгоно гэжээ. “Бид үнэгүй онгоц авч байна. Талархах хэрэгтэй биз дээ?” хэмээн Трамп хэлсэн нь олон нийтэд маргаан дагуулав.

Дүгнэвэл:

• Гурван улсын айлчлал зөвхөн эдийн засгийн гэрээ хэлэлцээрт төвлөрсөн

• Израиль, Газа, Украинтай холбоотой асуудалд анхаарал хандуулахгүй байгаа нь тодорхой

• Олон тэрбумын зэвсгийн наймаа, хөрөнгө оруулалтын хэлэлцээрүүд амжилттай өрнөж байна

• Трампын хувийн ашиг сонирхол байж болзошгүй талаарх дотоодын шүүмжлэл гарч эхэлжээ

Эх сурвалжууд: Yonhap, The New York Times, Reuters, Bloomberg, CNN, NBC News