АНУ-ын Ерөнхийлөгч Дональд Трамп Хятадаас илгээх шуудангийн илгээмжид ногдуулах тарифыг 120 хувиас 54 хувь хүртэл бууруулах тухай зарлигт гарын үсэг зуржээ. Шинэ тарифаар тооцох журам АНУ-ын Зүүн эргийн цагаар тавдугаар сарын 14-ний 00:01 цагаас эхлэн хэрэгжих юм.

Зарлигт зааснаар, илгээмжээс авах хураамжийн доод хэмжээ 100 ам.доллар хэвээр хадгалагдана. Энэхүү өөрчлөлт нь хоёр улсын хоорондын худалдааны татварын зөрчлийг бууруулах зорилготой бөгөөд Трампын засаг захиргаа өмнө нь Хятадын импортын бүтээгдэхүүнд ногдуулах тарифыг олон удаа нэмэгдүүлснээр илгээмжийн тариф 120 хувьд хүрээд байсан билээ.

Мөн Ерөнхийлөгч Трамп тавдугаар сарын 2-ноос эхлэн Хятадаас нийлүүлж буй 800 ам.доллароос доош үнэтэй барааг импортын татвараас чөлөөлөхгүй болохоо мэдэгдэж, “татвараас чөлөөлөгдөх босго хэт өндөр байгаа нь Хятадын талд давуу байдал үүсгэж байна” гэж мэдэгдэж байв.

Хариуд нь Хятадын тал АНУ-ын бүх бараанд ногдуулах тарифыг 125 хувь хүртэл нэмэгдүүлсэн бөгөөд худалдааны зөрчил хурцдаад байсан. Гэвч хоёр орны албаны төлөөлөгчид тавдугаар сарын 10–11-нд Швейцарьт уулзаж, татварын ачааллыг харилцан бууруулах тохиролцоонд хүрснээр тарифын шинэ өөрчлөлт бодит ажил хэрэг болж эхэлж байна.

Тарифын энэхүү бууралт нь Хятадаас АНУ руу чиглэсэн шуудан, цахим худалдааны урсгалыг тодорхой хэмжээнд хэвийн байдалд оруулах зорилготой бөгөөд цаашид худалдааны хэлэлцээрийн дараагийн шатны үндэс суурь болох хүлээлттэй байна.

Эх сурвалж: TASS