АНУ-ын Ерөнхийлөгч Дональд Трамп Булангийн орнуудад хийж буй албан ёсны айлчлалынхаа хүрээнд Саудын Арабт хүрэлцэн ирсэн тухай тус улсын “Al Arabiya” телевиз мэдээллээ. Энэхүү айлчлал нь Трамп хоёр дахь удаагаа Ерөнхийлөгчөөр сонгогдсоноос хойших анхны гадаад томилолт бөгөөд тэрбээр өмнөх бүрэн эрхийнхээ эхэнд ч мөн адил Саудын Арабт анхны айлчлалаа хийж байсан нь анхаарал татаж байна.

“Al Arabiya” телевизийн тайлбарласнаар, тус айлчлал нь бүс нутгийн геополитикийн нөхцөл байдал хурцдаж буй үед явагдаж буйгаараа онцлог бөгөөд Саудын Араб нь АНУ-ын хувьд аюулгүй байдал, эрчим хүчний хамтын ажиллагаа болон терроризмын эсрэг тэмцэлд стратегийн түнш гэдгийг онцолжээ.

Трампын энэ удаагийн айлчлал тавдугаар сарын 13-16-ны хооронд үргэлжлэх бөгөөд тэрбээр Саудын Араб, Катар, Арабын Нэгдсэн Эмират зэрэг Булангийн гурван улсад зочлох юм. АНУ-ын Төрийн департаментын мэдээлснээр, айлчлалын хүрээнд аюулгүй байдал, хиймэл оюун ухааны хөгжил, эрчим хүч, зэвсгийн нийлүүлэлт зэрэг чухал сэдвээр хэлэлцэхээр төлөвлөжээ.

Эр-Рияд хотноо тавдугаар сарын 14-нд болох Булангийн орнуудын хамтын ажиллагааны зөвлөлийн дээд хэмжээний уулзалт болон өнөөдөр зохион байгуулагдах хөрөнгө оруулалтын форум нь айлчлалын гол арга хэмжээнүүдийн нэг юм. Уг форумд “Tesla”, “SpaceX” компанийн тэргүүн Илон Маск, “Meta”-гийн гүйцэтгэх захирал Марк Цукерберг, “Citigroup”-ийн тэргүүн Жейн Фрейзер зэрэг Америкийн бизнесийн салбарын манлайлагчид оролцож, хоёр орны эдийн засгийн хамтын ажиллагааны шинэ боломжуудын талаар хэлэлцэх аж.

Эх сурвалж: Al Arabiya, Reuters