Пакистан улс Энэтхэгийн эсрэг “Буньян-ум-Марсус” нэртэй том хэмжээний цэргийн ажиллагааг тавдугаар сарын 10-ны бямба гарагт эхлүүлжээ. Энэ талаар Пакистаны PTV News агентлаг, Geo TV, Samaa TV, Al Jazeera зэрэг хэвлэлүүд Пакистаны зэвсэгт хүчний албан ёсны мэдэгдлээс иш татан мэдээлсэн байна.

Пакистаны зүгээс уг ажиллагааг “Энэтхэгийн түрэмгийллийн эсрэг сөрөг довтолгоо” гэж нэрлэсэн бөгөөд анхны цохилтууд Энэтхэгийн стратегийн чухал байгууламжуудад чиглэгджээ. Тухайлбал, Пенжаб муж дахь Бисе, Беасе хотуудад байрлах “Брамос” пуужингийн агуулахуудыг устгаж, Удхампур, Патханкоты нисэхийн баазуудад хохирол учруулсан байна.

Цэргийн ажиллагааны нэрийг Кораны “Сафф” бүлгийн 4 дэх аятаас авсан бөгөөд энэхүү хэсэгт “Аллах өөрийн хэрэг явдлын төлөө бат бэх хана мэт тулалдан зогсож байгаа дайчдыг хайрладаг” хэмээн бичигдсэн байдаг. “Буньян-ум-Марсус” хэмээх араб хэллэг нь үгчилбэл “тугалган цайз” гэсэн утгатай бөгөөд исламын сүсэгтнүүдийн эв нэгдэл, хүч чадлыг илэрхийлдэг хэмээн тайлбарлажээ.

Халдлагын улмаас Жамму, Кашмирын бүс нутгийн Ражури, Удхампур, Сринагар хотуудад дэлбэрэлтийн чимээ тасралтгүй сонсогдож байгаа талаар Times of India мэдээлсэн байна. Жаммуд цахилгаан тасарч, Энэтхэгийн Харьяна мужид нийслэл рүү чиглэсэн холын тусгалын “Фатх-II” пуужинг Энэтхэгийн тал амжилттай сөнөөсөн тухай News18 агентлаг мэдээлэв.

Энэтхэг, Пакистаны хилийн дагуу буудалцаан үргэлжилж, Адампурын нисэх хүчний бааз ч устгагдсан гэх мэдээлэл байна. Үүнээс гадна Пакистан Энэтхэгийн цахим дэд бүтцийг онилон кибер довтолгоо зохион байгуулж, тус улсын нийт цахилгаан эрчим хүчний 70 хувийг тасалдуулсан талаар мэдээлжээ.

Энэтхэгийн зэвсэгт хүчин бэлтгэл цэргийн хүчнээ татан төвлөрүүлж, өндөржүүлсэн бэлэн байдалд шилжсэн байна.

Энэхүү хурцадмал нөхцөл байдал олон улсын анхаарлыг татаж, бүс нутгийн тогтвортой байдалд ноцтой аюул учруулаад байна.

Эх сурвалж: Geo TV, Samaa TV, Al Jazeera, Times of India, News18.