Тавдугаар сарын 9-нд Москвагийн Улаан талбайд Ялалтын баярын парад сүр жавхаатай болж өнгөрлөө. Оросын төр, засгийн төлөөллөөс гадна гучаад орны төрийн тэргүүн, өндөр албан тушаалтнууд энэхүү арга хэмжээнд хүрэлцэн ирсэн байна.

Парад дээр Армений Ерөнхий сайд Никол Пашинян, Белорусийн Ерөнхийлөгч Александр Лукашенко хүү Николайн хамт оролцсон бол Хятадын дарга Ши Жиньпин, Казахстаны Ерөнхийлөгч Касым-Жомарт Токаев, Тажикистаны Ерөнхийлөгч Эмомали Рахмон, Узбекистаны Ерөнхийлөгч Шавкат Мирзиеев, Кыргызстаны Ерөнхийлөгч Садыр Жапаров нар мөн оролцлоо.

Хятадын дарга Ши Жиньпин энэ үеэр тусгай зочны статустай хүрэлцэн ирсэн нь онцлог үйл явдал боллоо.

Сербийн Ерөнхийлөгч Александр Вучич Москвад адал явдалтайгаар хүрэлцэн иржээ. Литва, Латви улс түүний онгоцыг агаарын орон зайгаар нэвтрүүлэхээс татгалзсан тул Вучичийн онгоц Бакуд бууж шатахуун цэнэглээд Москвад хүрсэн байна. Мөн Словакийн Ерөнхий сайд Роберт Фицо ОХУ-д хүрэхийн тулд олон улсын агаарын зайг тойрон урт зам туулсан нь хэвлэлүүдэд онцлог үйл явдал болж бичигдэв.

Белорусьт айлчилсны дараа Гвиней-Бисау улсын Ерөнхийлөгч Умару Сисоку Эмбало Москвад хүрэлцэн ирсэн бол Венесуэлийн Ерөнхийлөгч Николас Мадуро, Буркина-Фасогийн Ерөнхийлөгч Ибрагим Траоре нар парадад оролцлоо.

Монгол Улс, Куба, Туркменистан, Вьетнам, Венесуэл, Египт, Этиоп, Зимбабве, Палестин, Буркина-Фасо, Босни ба Герцеговина, Конго, Экваторын Гвинейн тэргүүн нар Ялалтын баярын парадад оролцсон байна.

Лаосын Ерөнхийлөгч Тхонглун Сисулит хүнд хэлбэрийн коронавирусийн халдварын улмаас айлчлалаа цуцалж, орны нь Гадаад хэргийн сайд Москвад хүрэлцэн иржээ. Азербайжаны Ерөнхийлөгч Ильхам Алиев энэ удаа оролцоогүй бөгөөд эцэг Гейдар Алиевт зориулсан дотоодын арга хэмжээнд оролцож байсан аж.

Энэтхэг, Индонези, Никарагуа, БНАСАУ, Өмнөд Африкийн Бүгд Найрамдах Улсыг төрийн тэргүүнүүд бус, өндөр албан тушаалын төлөөлөгчид төлөөлсөн байна.

Энэ жил Ялалтын баярын үеэр Москвад урьд өмнө байгаагүй өндөр түвшний аюулгүй байдлын арга хэмжээ авсан бөгөөд баярын өдрүүдэд интернэтийн үйлчилгээнд ч хязгаарлалт хийсэн талаар мэдээлжээ.

Эх сурвалж: officelife.media, eadaily.com.