Женев хотноо тавдугаар сарын 10-11-ний өдрүүдэд болсон АНУ, Хятадын худалдааны асуудлаарх хэлэлцээ амжилттай өндөрлөж, татварын асуудлаар тохиролцоонд хүрсэн талаар АНУ-ын төлөөлөгч Жеймисон Грир мэдээллээ.

Хэлэлцээний дараа Ж.Грир “Хятадын түншүүдтэй байгуулсан энэхүү тохиролцоо нь үндэсний хэмжээнд зарласан онц байдлыг зохицуулахад дэмжлэг болно гэдэгт итгэлтэй байна” хэмээн онцлов. АНУ-ын Ерөнхийлөгч Дональд Трамп өмнө нь худалдааны тэнцлийн алдагдал нь үндэсний аюулгүй байдалд эрсдэл үүсгэж буйг тодотгон онц байдал зарласан юм.

Хятадын талаас албан ёсны тайлбар хийгээгүй ч хэлэлцээний үеэр санал зөрөлдөөн анх таамаглаж байснаас ноцтой биш гэдэг дээр талууд санал нэгдсэн байна. АНУ-ын Сангийн сайд Скотт Бессент хэлэлцээний талаар “томоохон ахиц дэвшил гарсан” гэж мэдэгдсэн бол Хятадын Төрийн зөвлөлийн шадар сайд Хэ Лифэн үүнтэй санал нэг байгаагаа илэрхийлжээ.

Хэлэлцээ XVIII зууны үеийн түүхэн барилга болох Женев нуурын эрэг дээрх “Villa Saladin”-д зохион байгуулагдсан бөгөөд тавдугаар сарын 10-нд хоёр цаг орчим үргэлжилж, маргааш нь үргэлжилсэн байна.

Д.Трамп хэлэлцээний үр дүнгийн талаар “Америк-Хятадын харилцаа дахин сэргэж байна” хэмээн онцолж, “Өнөөдөр Швейцар улсад Хятадын төлөөлөгчидтэй маш үр дүнтэй уулзалт хийлээ. Найрсаг бөгөөд бүтээлч уур амьсгалд олон асуудлыг хэлэлцэж, тохиролцоонд хүрсэн. Бид Хятад улсыг Америкийн бизнес эрхлэгчдэд илүү нээлттэй болгох нөхцөлийг бүрдүүллээ. Гайхалтай амжилтанд хүрлээ!” хэмээн “Truth Social” сүлжээнд бичжээ.

Эх сурвалж: AP