Криптовалютын зах зээлд түүхэн амжилт тогтоогдож, биткоины ханш энэ оны нэгдүгээр сарын 31-нээс хойш анх удаа 105 мянган ам.доллароос давлаа. “Binance” биржийн арилжааны явцад биткоины ханш 0.34 хувиар өсч, 105 032 ам.долларт хүрсэн байна.

Зах зээлийн шинжээчдийн үзэж буйгаар, ам.долларын ханшийн тогтворгүй байдал, хөрөнгө оруулагчдын ам.долларт итгэх итгэл суларч, дэлхий дахинд үүсээд буй худалдааны шинэ дайнтай холбоотой тодорхойгүй байдал биткоины үнэ огцом өсөх нөхцөл бүрдүүлсэн байна.

Мөн биткоинд хөрөнгө оруулах гэсэн санхүүгийн байгууллагуудын сонирхол эрчимтэй нэмэгдэж, хөрөнгийн биржид бүртгэлтэй биткоины арилжааны сангуудад (ETF) их хэмжээний хөрөнгө тасралтгүй урсаж байгааг мэргэжилтнүүд онцолж байна. Энэ нь биткоиныг улам бүр санхүүгийн зах зээлд бат бөх байр суурьтай болсны илэрхийлэл болж байна.

Энэ өсөлтийн бас нэгэн хүчин зүйл нь АНУ-ын Ерөнхийлөгч Дональд Трамп стратегийн криптовалютын нөөц бүрдүүлэх зарлигт гуравдугаар сарын 7-ны өдөр гарын үсэг зурсан явдалтай холбоотой. Тэрбээр уг нөөцийг биткоин, этереум зэрэг өндөр үнэлгээтэй криптовалютуудаар бүрдүүлэх тухай мэдэгдсэн нь зах зээлд эерэг дохио өгч, хөрөнгө оруулагчдын итгэлийг нэмэгдүүлсэн байна.

Эх сурвалж: ТАСС