ОХУ-ын Ерөнхийлөгч Владимир Путин Украины талтай ямар нэгэн урьдчилсан болзолгүйгээр тавдугаар сарын 15-нд Туркийн Истанбул хотод шууд хэлэлцээ хийх саналыг тавьсан талаар DW агентлаг мэдээлжээ. В.Путин хэлэлцээний гол зорилгыг зөрчилдөөн үүсэх болсон шалтгаануудыг арилгаж, түүхэн алсын хараатай, урт хугацааны бат бөх энх тайвныг тогтоох явдал хэмээн тодорхойлсон байна. Тэрбээр яриа хэлэлцээний явцад түр эвлэрэл болон гал зогсоох бодит тохиролцоонд хүрэх боломжийг үгүйсгэхгүй хэмээн нэмж онцолжээ.

Энэ хүрээнд тавдугаар сарын 12-нд Туркийн Ерөнхийлөгч Режеп Тайип Эрдогантай утсаар ярихаар төлөвлөж буйгаа мэдэгдсэн байна. Гэсэн ч В.Путин Украины зүгээс санал болгосон 30 хоногийн хугацаатай гал зогсоох асуудалд тодорхой байр суурь илэрхийлээгүй байна. Харин өмнө нь Кремлийн хэвлэлийн нарийн бичгийн дарга Дмитрий Песков ОХУ энэ саналыг нарийн судалж үзсэний үндсэн дээр хэрэгжүүлэх боломжтой гэж мэдэгдсэн юм.

АНУ-ын Axios цахим хуудсанд мэдээлснээр, хэрэв В.Путин 30 хоногийн гал зогсоох саналыг хүлээн авбал Украины Ерөнхийлөгч Владимир Зеленский Оростой шууд хэлэлцээ хийхэд бэлэн гэж Дональд Трамптай утсаар ярихдаа мэдэгджээ. Д.Трамп Украины удирдагчийн энэхүү байр сууринд сэтгэл хангалуун байгаагаа илэрхийлсэн бөгөөд одоо ОХУ-ын хариуг хүлээж буй талаар мэдээлэлтэй эх сурвалжууд мэдээлсэн байна.

В.Путин мөн сэтгүүлчдэд мэдэгдэл хийх үеэр Украины талыг өмнө нь тогтсон эвлэрлийн хугацаанд эрчим хүчний байгууламжуудад цохилт өгсөн, Улаан өндөгний баярын эвлэрлийн үеэр 5000 гаруй удаа гал нээсэн, тавдугаар сарын 8-10-ны хооронд таван удаа хил даван нэвтрэхийг оролдсон гэж буруутгажээ.

Украины тал өмнө нь дөрөвдүгээр сарын сүүлчээр хэрэгжүүлсэн Улаан өндөгний баярын эвлэрлийн үеэр ОХУ-ын Зэвсэгт хүчин цэргийн ажиллагаагаа үргэлжлүүлсэн гэж буруутгаж, иргэний дэд бүтцэд халдсан гэдгийг онцолж байсан юм. Украины Ерөнхийлөгч В.Зеленский тухайн үед алсын зайны дрон болон холын тусгалтай пуужингаар довтолгоо хийхийг 30 хоногийн хугацаагаар зогсоохыг санал болгож байсан ч одоогоор энэхүү саналд тодорхой үр дүн гараагүй байна.

Эх сурвалж: DW, Axios