ЗХУ-ын хөөргөсөн “Космос-482” гараг хоорондын автомат станц дэлхийн тойрог замаас гарч чадалгүй 53 жилийн турш татах хүчний нөлөөнд оршсоор өнгөрсөн бямба гарагт Индонезын эргийн ойролцоо Энэтхэгийн далайд унасан тухай “Роскосмос” корпорац мэдээллээ.

Энэхүү нэг метрийн голчтой, 500 гаруй килограмм жинтэй сансрын төхөөрөмжийг 1972 оны гуравдугаар сард Сугар гаргийг судлахаар хөөргөсөн ч техникийн доголдлоос болж дэлхийн тойрог замаас хэтэрч чадаагүй юм. Ийнхүү олон арван жилийн турш орбитод эргэлдсэн уг төхөөрөмж дэлхийн агаар мандалд орж шатсан ч зарим хэсгүүд нь далайд унасан байна.

Төхөөрөмж газардсанаас өмнөхөн Европын сансар судлалын агентлаг (ESA) Германы нутаг дэвсгэрийг унах магадлалтай бүсэд хамруулсан зураглал гаргасан нь тус улсын хэвлэл мэдээллийн хэрэгслүүдэд нэлээдгүй шуугиан тарьжээ. "Süddeutsche Zeitung" сонин “Анхаар! Дээрээс Зөвлөлтийн зонд унаж байна” хэмээн онцолсон бол "Münchner Merkur", "Frankfurter Rundschau" зэрэг хэвлэлүүд Германы зарим нутаг аюулын бүсэд байна гэж сэрэмжлүүлж байв.

Тус станц Магдебург хүртэлх хамгийн хойд бүсийг унах боломжтой бүс гэж тооцоолж байсан ч Бундесверийн төлөөлөгч энэ магадлал тун бага гэдгийг мэдэгдсэн байна. Гэсэн ч аюулыг бүрэн үгүйсгээгүй юм. Брауншвейгийн Техникийн их сургуулийн эрдэмтэд иргэдийг тайван байхыг уриалж, төхөөрөмж Германы газар нутагт унах эрсдэл хязгаарлагдмал байгааг онцолжээ.

“Космос-482” төхөөрөмж бямба гарагт буюу өчигдөр Берлиний цагаар 06:30-аас 08:04 цагийн хооронд Германы дээгүүр нисэж өнгөрсөн бөгөөд Москвагийн цагаар 09:24 (Берлиний цагаар 08:24) цагт агаар мандлын нягт давхаргад орж, хэсэгчлэн шатсны дараа Энэтхэгийн далайд унасан гэж “Роскосмос”-ын албан ёсны мэдэгдэлд дурдсан байна.

Эх сурвалж: DW, Dpa, Роскосмос