АНУ-ын Ерөнхийлөгч Дональд Трамп, Их Британийн Ерөнхий сайд Кир Стармер нар пүрэв гарагт утсаар ярьсны дараа хоёр улсын хооронд худалдааны шинэ гэрээ байгуулсан талаар албан ёсоор мэдэгдлээ.

Цагаан ордны тэргүүн энэ хэлэлцээрийг “Их Британи Европын Холбооноос гарснаас хойших анхны түүхэн худалдааны гэрээ” хэмээн онцлон тэмдэглэсэн байна.

Гэрээний хүрээнд АНУ-аас Их Британид нийлүүлэх хөдөө аж ахуйн бүтээгдэхүүний хэмжээг олон тэрбум ам.доллараар нэмэгдүүлэхээр тусгасан бөгөөд үүнд:

• АНУ-аас нийлүүлэх үхрийн мах, биоэтанолын хэмжээ нэмэгдэх,

• Их Британи талаас Boeing компанид олон тэрбум фунтын үнэ бүхий нисэх онгоцны захиалга өгөхөөр төлөвлөжээ.

Д.Трампын мэдэгдсэнээр, энэхүү хэлэлцээр АНУ-ын гадаад худалдаанаас 6 тэрбум ам.долларын нэмэлт орлого, хөдөө аж ахуйн салбарын фермерүүд, үйлдвэрлэгчдэд 5 тэрбум ам.долларын шинэ экспортын боломж бий болгох юм.

Мөн гэрээнд:

• Хөнгөн цагаан, гангийн худалдаанд зориулсан хоёр талын бүс байгуулах,

• Эмийн бүтээгдэхүүний нийлүүлэлтийг аюулгүй, эрсдэлгүй болгох арга хэмжээ авах талаар тусгасан байна.

Д.Трамп гэрээний нарийвчилсан заалтуудыг ирэх хэдэн долоо хоногт эцэслэн тохиролцоно гэдгээ хэвлэлийн хурлын үеэр мэдэгджээ.

Цаашид АНУ Энэтхэг, Израилтай худалдааны шинэ гэрээ байгуулах гэж буй бөгөөд Япон, Өмнөд Солонгос, Вьетнам зэрэг орнуудтай хэлэлцээг үргэлжлүүлж байгаа юм.

Эх сурвалж: DW