ОХУ-ын Шадар сайд Александр Новак “Сибирийн хүч-2” байгалийн хий дамжуулах хоолойн чиглэлийг өөрчлөх асуудлыг огт хэлэлцээгүй гэж мэдэгдлээ. Тэрбээр сэтгүүлчдийн асуултад хариулахдаа “энэ асуудал өмнө нь ч, одоо ч яригдаагүй” хэмээн онцлов.
ОХУ-ын Ерөнхийлөгч Владимир Путин, БНХАУ-ын дарга Ши Жиньпин нар пүрэв гарагт Кремльд албан ёсны уулзалт хийсэн бөгөөд уг уулзалтын үеэр мөн энэ асуудлыг хөндөөгүй гэж Шадар сайд тайлбарласан байна.
“Сибирийн хүч-2” төсөл нь Баруун Сибириэс Монгол Улсын нутаг дэвсгэрээр дамжуулан БНХАУ-д жилд 50 тэрбум шоо метр байгалийн хий нийлүүлэх стратегийн ач холбогдол бүхий томоохон төсөл юм. Энэ төслийн хүрээнд анх 2015 оны тавдугаар сарын 8-нд Орос, Хятадын талууд үндсэн нөхцөлүүдийн талаар хэлэлцээр байгуулж гарын үсэг зурсан байдаг.
Гэсэн хэдий ч төслийн зарим чухал асуудлууд одоо болтол шийдэгдээгүй хэвээр байгаа бөгөөд хэлэлцээ удааширсан нь үүнийг илтгэж байна гэж салбарын мэргэжилтнүүд дүгнэж байна. Мөн хоолойн чиглэлийг өөрчлөх асуудлаар Казахстаны нутгаар дамжуулах, жилд 45 тэрбум шоо метр хүчин чадалтай хоолой барих хувилбар ч яригдаж байгаа тухай мэдээлэл цацагдсан ч албан ёсоор батлагдаагүй байна.
Эх сурвалж: RIA Novosti
