Германы шинэ засгийн газрын тэргүүн Фридрих Мерц Парис, Варшав хотод анхны гадаад айлчлалаа хийж, Шольцын үед орхигдсон гэж үзэгдэж байсан “Веймарын гурвалжин”-гийн харилцааг дахин идэвхжүүлэх алхам хийлээ. Тэрбээр Франц болон Польш улстай харилцаагаа сэргээж, бүс нутгийн эвсэлд шинэ эрч хүч өгөхийг эрмэлзэж буйг олон ажиглагчид онцолж байна.
Ф.Мерцийн шүүмжлэл нь Шольц, Макроны хоорондын тааруухан харилцаа, шийдэгдээгүй асуудлуудаас үүдэлтэй. Тухайлбал, Франц эрчим хүчний бие даасан байдлыг чухалчилж, атомын эрчим хүчийг хамгаалдаг бол Герман сэргээгдэх эрчим хүчийг дэмждэг ч худалдааг нээлттэй байлгах байр суурьтай. Энэ зөрүү нь хоёр улсын харилцаанд үл ойлголцол дагуулсаар иржээ.
Гэсэн ч шинжээчдийн үзэж буйгаар хоёр улсын харилцаа нь удирдагчдын хувийн харилцаанаас давсан, түүхэн хөрсөн дээр тулгуурладаг гэдгийг мартаж болохгүй. Франц-Германы хүрээлэнгийн дэд захирал Стефан Сейдендорф үүнийг онцолж, “харилцаа тогтвортой байх ёстой, хувь хүний нийцэлд бус институцийн хүчирхэг хамтын ажиллагаанд түшиглэж ирсэн” хэмээн дурдсан байна.
Мөн Польш улсад Европын үзэлтэй Дональд Туск дахин засгийн эрхэнд гарснаар Герман-Польшийн харилцаа өмнөхөөсөө уян хатан, хамтын ажиллагааны чиг баримжаатай болж эхэлжээ. Гэхдээ цагаачлалтай тэмцэх зорилгоор Герман улс хилийн хяналтаа чангатгаж магадгүй байгаа нь ойрын ирээдүйд санал зөрөлдөөн үүсгэх магадлалтайг ажиглагчид анхааруулж байна.
Эх сурвалж: DW
