Оросын Ерөнхийлөгч Владимир Путин Аугаа Эх орны дайны ялалтын 80 жилийн ойг тохиолдуулан тавдугаар сарын 8-ны 00:00 цагаас эхлэн тавдугаар сарын 11-ний 00:00 цаг хүртэл үргэлжлэх 72 цагийн түр эвлэрэл зарлаж, энэ хугацаанд байлдааны бүх ажиллагааг зогсоох шийдвэр гаргасан тухай Оросын төрийн мэдээллийн агентлаг “TASS” мэдээллээ.

Гал зогсоох шийдвэрийг дөрөвдүгээр сарын сүүлчээр олон нийтэд зарласан бөгөөд Оросын тал энэхүү эвлэрлийг мөрдөнө гэдгээ нотолж, хэрэв Украины тал зөрчвөл хариу арга хэмжээ авахаа мэдэгдээд байна. Ерөнхийлөгчийн хэвлэлийн төлөөлөгч Дмитрий Песков хэлэхдээ, эвлэрлийн асуудлаарх Оросын байр суурь тодорхой бөгөөд шинэ чиглэл, өөрчлөлт гараагүй хэмээн мэдэгдсэн байна.

Харин Украины Ерөнхийлөгч Володимир Зеленский энэ саналыг хүлээж авахгүй гэдгээ тавдугаар сарын 3-нд мэдэгдэж, улмаар гал зогсоох хугацааны эхэнд буюу лхагва гаргийн шөнө Украины Зэвсэгт хүчнүүд Оросын нутаг руу дроны дайралт хийжээ. Оросын агаарын довтолгооноос хамгаалах системүүд Москва орчмын есөн дроныг устгасан гэж нийслэлийн захирагч Сергей Собянин мэдээлсэн байна.

Энэ нь Орос-Украины зөрчил эхэлснээс хойших гурав дахь удаагийн түр эвлэрэл бөгөөд өмнөх хоёр удаагийн Зул сарын болон Улаан өндөгний баярын эвлэрлийг мөн Украины тал зөрчсөн хэмээн Кремль буруутгаж байв.

Эх сурвалж: TASS