Их Британийн Үндэсний эрүүл мэндийн алба (NHS)-тай холбоотой зургаан сая фунт стерлингийн үнэ бүхий гэрээний хүрээнд олон жилийн турш үргэлжилсэн авлигын хэрэг илэрч, дөрвөн албан тушаалтан буруутай нь тогтоогдсон тухай BBC мэдээллээ. Шотландын Айрширт байрладаг “Oricom” компани 2010-2017 оны хооронд NHS-ийн хэд хэдэн салбартай гэрээ байгуулахын тулд хахууль өгсөн нь мөрдөн шалгалтаар нотлогдсон байна.
Уг компанийн зүгээс эрх бүхий албан тушаалтнуудад их хэмжээний бэлэн мөнгө, тансаг зэрэглэлийн аялал, үнэтэй тоног төхөөрөмж, концертын тасалбар, ресторанд үйлчлүүлэх эрх зэрэг эд зүйлийг хахууль болгон өгч байжээ. Харин авлига авсан албан тушаалтнууд төрийн байгууллагын нууц мэдээллийг задруулж, хууль бус гэрээнүүд байгуулсан байна.
Шотланд дахь NHS-ийн таван салбар энэ авлигын сүлжээнд хамрагдсан бөгөөд шүүхийн шийдвэрээр Адам Шаруди, Гэвин Браун, Дэвид Бэйли, Алан Хуш нар буруутай гэж үзэгдэн ял шийтгүүлжээ. Мөрдөн шалгах явцад бас нэг этгээдэд холбогдох хэргийг хэрэгсэхгүй болгосон байна.
Прокурорын байгууллага энэ үйлдлийг олон жил үргэлжилсэн, төрийн итгэлийг хөсөрдүүлсэн ноцтой авлигын сүлжээ хэмээн дүгнэж, хахууль өгөх, авах нь төрийн үйл ажиллагаанд ноцтой хохирол учруулдаг гэдгийг онцоллоо. Мөрдөн шалгах ажиллагааны явцад талуудын хооронд бичгээр хийсэн харилцаа, банкны шилжүүлэг, аяллын тасалбар зэрэг нотлох баримтуудыг цуглуулсан байна.
Тус хэргийн улмаас Шотланд дахь NHS-ийн худалдан авалтын ил тод байдалд анхаарал хандуулж, цаашид төрийн худалдан авалтад хяналт, хариуцлагыг сайжруулах шаардлагатайг шинжээчид онцолж байна.
Эх сурвалж: www.bbc.com
