Грекийн Засгийн газар даваа гарагт эцэг эхчүүд хүүхдүүдийнхээ цахим хэрэглээг хянах, насыг баталгаажуулах боломж бүхий “Kids Wallet” нэртэй гар утасны шинэ аппликейшнийг нэвтрүүллээ. Уг арга хэмжээ нь хүүхдүүдийн цахим орчинд өнгөрөөх цагийг хязгаарлах, зохисгүй агуулгаас хамгаалах, технологийн сөрөг нөлөөллийг бууруулах зорилготой юм.

Цахим засаглалын сайд Димитрис Папастергиу “Бид эцэг эхчүүдэд хүүхдээ хамгаалах хүчирхэг хэрэгсэл олгож байна” хэмээн онцлон тэмдэглэсэн бол Ерөнхий сайд Кириакос Мицотакис гэр бүлийн амьдралд технологийн нөлөөлөлд санаа зовниж буйгаа илэрхийлжээ.

Аппликейшний гол боломжууд:

• 15 наснаас дээш хүүхдэд эцэг эхийн зөвшөөрөл шаардахгүй

• Өдөрт цахим орчинд өнгөрөөх хугацааг хянах

• Апп болон вэб хандалтыг хязгаарлах

• Хүүхдийн насыг баталгаажуулж “дижитал үнэмлэх” үүсгэх

Аппликейшн нь Грекийн төрийн татварын бүртгэлтэй нэгтгэгдсэн бөгөөд эцэг эхчүүд өөрийн бүртгэлээр дамжуулан хүүхдэдээ тохиргоо хийх боломжтой. Хэрэглээний хүрээнд эцэг эх нь төрийн үйлчилгээний платформ дээрээс шаардлагатай бичиг баримт байршуулан нас баталгаажуулалт хийснээр систем хүүхдэд тохирох цахим эрх олгоно.

Хэрэгцээ, судалгаанд үндэслэсэн алхам

Грекийн KMOP судалгааны төвийн 2024 оны тайлангаар:

• 9–12 насны хүүхдүүдийн 76.6% нь хувийн төхөөрөмжөөр интернэт хэрэглэдэг

• 58.6% нь өдөр бүр нийгмийн сүлжээнд нэвтэрдэг

• 22.8% нь зохисгүй контент үздэг гэсэн дүн гарчээ

Эдгээр үзүүлэлт нь “Kids Wallet” аппликейшн нэвтрүүлэх зайлшгүй шаардлагыг харуулж буй бөгөөд уг хэрэгсэл нь хүүхдийн гэмт хэрэг, цахим эрсдэлээс урьдчилан сэргийлэх Европын Холбооны төлөвлөгөөтэй уялдаж байгаа юм.

Ийм төрлийн программ хангамжийг төрөөс албан ёсоор гаргаж, төрийн платформуудтай нэгтгэж хэрэглээнд нэвтрүүлж буй тохиолдол цөөн байдгийн нэг жишээ болж байна. Австрали, Нидерланд зэрэг орнууд мөн цахим хэрэглээний насыг хязгаарлах хуулиар ижил чиглэлийн бодлого баримталж байна.

Эх сурвалж: DW