АНУ-ын Батлан хамгаалахын сайд Пит Хегсет даваа гарагт гаргасан санамж бичгээр Америкийн зэвсэгт хүчний удирдах албан тушаалтнуудын тоог эрс цомхотгох тушаал гаргалаа. Тэрбээр дөрвөн одтой генерал, адмиралуудын тоог 20 хувиар бууруулахын сацуу, нийт генерал болон адмиралуудыг 10 хувь, Үндэсний гвардын генералуудыг 20 хувиар цомхотгохыг зорьж байгаа талаар мэдэгдсэн байна.

Энэхүү шийдвэр нь АНУ-ын армийн удирдлагын бүтэц, хуваарилалтыг оновчтой болгох, “илүү олон генералтай байлаа гээд илүү амжилтад хүрэхгүй” гэх зарчмыг баримтлан “цөөн генерал, олон цэрэг” гэсэн уриан дор хэрэгжиж байгаа аж.

Цомхотголын шийдвэр нь Ерөнхийлөгч Дональд Трампын засаг захиргаа үүрэгт ажилдаа орсноос хойш хийгдэж буй Пентагоны томоохон өөрчлөлт, шинэчлэлийн нэг хэсэг бөгөөд хоёрдугаар сард Штабуудын дарга нарын нэгдсэн хорооны дарга генерал Чарльз К.Брауныг халсан явдал түүний эхлэл болсон.

Үүний дараа:

• Тэнгисийн цэргийн болон эргийн хамгаалалтын албаны дарга нар

• Үндэсний аюулгүй байдлын агентлагийн генерал

• Агаарын цэргийн штабын дэд дарга

• НАТО-д томилогдсон адмирал

• Цэргийн гурван хуульч зэрэг өндөр албан тушаалтнууд ч мөн албан үүргээс чөлөөлөгдсөн байна.

Мөн Пентагонд ажилладаг энгийн албан хаагчдыг 5 хүртэл хувиар цомхотгож, шинэ ажилтан авахыг түр хугацаанд зогсоохыг даалгасан юм.

Энэхүү шинэчлэл АНУ-ын батлан хамгаалах тогтолцоог илүү уян хатан, хэмнэлттэй болгохыг зорьж буй ч, цэргийн командлалын тогтвортой байдалд сөрөг нөлөө үзүүлж болзошгүй гэсэн байр суурь зарим шинжээчдийн зүгээс илэрхийлэгдэж байна.

Эх сурвалж: AP