Европын Комисс 500 сая еврогийн нэмэлт санхүүжилт гарган, дэлхийн тэргүүлэх эрдэмтдийг, тэр дундаа АНУ-ын судлаачдыг татах зорилгоор “Шинжлэх ухааны төлөө Европыг сонгоцгооё” хөтөлбөрийг 2025–2027 оны хооронд хэрэгжүүлэхээр болжээ. Уг шийдвэрийг Европын Комиссын дарга Урсула фон дер Ляйен даваа гарагт Парис хотноо мэдэгдэв.

Энэ нь АНУ-ын Ерөнхийлөгч Дональд Трамп шинжлэх ухааны бодлогод хязгаарлалт тогтоож эхэлсэнтэй холбоотойгоор Европын Холбоо чөлөөт, ил тод, суурь судалгааг хамгаалах байр сууриа нотлон харуулах алхам болж байна. Урсула фон дер Ляйен “Шинжлэх ухааны эрх чөлөөг хязгаарлах нь том алдаа” хэмээн онцолж, Европ бол дэлхийн эрдэмтдийг дэмжих төв байх ёстой гэдгийг дахин баталлаа.

Францын Ерөнхийлөгч Эммануэл Макрон энэ санаачлагыг дэмжиж, Франц улс нэмэлтээр 100 сая евро зарцуулахаа мэдэгдсэн бөгөөд “Европ бол шинжлэх ухааны аюулгүй боомт байх ёстой” хэмээн тодотголоо. Тэрбээр “Чөлөөт шинжлэх ухаангүйгээр бат бөх ардчилал орших боломжгүй” хэмээн онцлон хэлсэн байна.

Францын засгийн газар дөрөвдүгээр сарын дунд үеэс эхлэн гадаадын судлаачдыг татах зорилго бүхий цахим платформ ажиллуулж эхэлсэн бөгөөд энэ нь чөлөөт шинжлэх ухаанд итгэдэг судлаачдыг уриалах томоохон алхам хэмээн үзэж байна.

Америк дахь эрдэмтдийн шилжилт хөдөлгөөн нэмэгдэж болзошгүй

Сэтгүүл “Nature”-ийн мэдээлснээр АНУ-ын эрдэмтдийн 75 гаруй хувь нь гадаадад суурьших боломжийг эрэлхийлж байгаа бөгөөд Трампын бодлогыг эсэргүүцсэн хэд хэдэн нэр нөлөө бүхий судлаач АНУ-аас явахаа мэдэгдсэн байна. Судалгаанд суурилсан, нээлттэй эрдэм шинжилгээний орчинд тулгуурласан либерал ардчиллын үнэт зүйлийг хамгаалахын тулд Европ харьцангуй эрх чөлөөтэй, таатай нөхцөл бүрдүүлэхийг зорьж байна.

Эх сурвалж: DW