Румыний ерөнхийлөгчийн сонгуулийн эхний шатанд хэт барууны үзэлтэй нэр дэвшигч Жорж Симион тэргүүлсний дараа Ерөнхий сайд Марчел Чолаку даваа гарагт огцорно гэдгээ мэдэгдлээ. Уг үйл явдал нь тус улсад улс төрийн тогтворгүй байдал үүсгэж, дахин үймээн дэгдэх нөхцөлийг бүрдүүлээд байна.

Румыний хэвлэлүүдийн мэдээлснээр, мягмар гарагийн өглөө түр ерөнхий сайдыг томилохоор болжээ. 2023 оноос хойш Ерөнхий сайдаар ажиллаж буй Марчел Чолаку нь зүүн төвийн үзэл баримтлалтай Социал демократ нам (PSD)-ыг удирддаг. Гэвч тус намын ерөнхийлөгчид нэр дэвшигч Крин Антонеску ням гарагт болсон санал хураалтаар гуравдугаар байрт орж, сонгуульд ялагдсан байна.

Ирэх тавдугаар сарын 18-нд болох ерөнхийлөгчийн сонгуулийн хоёр дахь шатанд хэт барууны үзэл баримтлагч Жорж Симион болон Бухарест хотын дарга, бие даан нэр дэвшигч Никушор Дан нар өрсөлдөхөөр болжээ. Ингэснээр Румыний томоохон уламжлалт намууд хоёрдугаар шатнаас бүрэн гарч, шинэ улс төрийн төлөөллүүд давамгайлах магадлал өндөр болоод байна.

М.Чолаку өнгөрсөн жил хүчингүй болсон сонгуульд өөрөө нэр дэвшсэн боловч тансаг зэрэглэлийн онгоц ашигласан гэх шүүмжлэлд өртөж, нийт санал өгөгчдийн тавны нэг ч хүрэхгүй дэмжлэг авч, гуравдугаар байрт бичигдсэн юм. Тэрбээр албан ёсоор огцрох хүсэлтээ гаргасан ч одоогоор Ерөнхий сайдын албан тушаалдаа хэвээр үлдээд байгаа юм.

Жорж Симион өмнө нь “Politico” сонинд өгсөн ярилцлагадаа томоохон намууд дахин ялагдал хүлээвэл Ерөнхий сайд зайлшгүй огцрох ёстой хэмээн мэдэгдэж байв. Түүнчлэн тэрбээр өнгөрсөн арваннэгдүгээр сарын сонгуулиар ялалт байгуулсан Калин Жоржескуг дараагийн Ерөнхий сайдад хамгийн тохиромжтой хүн гэж тодорхойлсон байна.

Эх сурвалж: Politico