Дэлхийн II дайн Европт дууссаны 80 жилийн ойн баяр ёслолын ажиллагаа Их Британид албан ёсоор эхэллээ. Хэдий Европын орнууд энэ өдрийг уламжлал ёсоор тавдугаар сарын 8-нд тэмдэглэдэг ч энэ жил тэгш ой тохиож байгааг тохиолдуулан баяр хэдэн өдрийн турш үргэлжлэх юм.

Ёслолын ажиллагаа даваа гаргийн яг үд дунд Биг-Бен цамхгийн хонх дуугараснаар эхэлсэн бөгөөд 1945 оны тавдугаар сарын 8-нд радио долгионоор цуурайтсан Уинстон Черчиллийн ялалтын үгийг жүжигчин Тимоти Сполл дахин уншин олон нийтэд хүргэжээ.

Парламентын талбайгаас Букингемийн ордон хүртэл 1300 гаруй хүнийг хамарсан цэргийн ёслолын жагсаал болж, жагсаалын тэргүүн эгнээнд Дэлхийн II дайны ахмад дайчин, зуу нас сүүдэр зооглосон Алан Кеннет алхан оролцжээ. Ёслолын үеэр Их Британийн хаан III Чарльз, хатан хаан Камилла, Уэльсийн хунтайж Уильям болон гэргий Кейт, ханхүү Жорж, ханхүү Луи, гүнж Шарлотта нар хүрэлцэн ирж хүндэтгэл үзүүлсэн байна.

Цэргийн жагсаалд Украины цэргүүд оролцсон нь онцлог байв. Тэд энх тайван, тусгаар тогтнол ямар үнэ цэнтэй болохыг харуулсан чухал арга хэмжээ хэмээн үзсэнээ илэрхийлжээ.

Нисэх хүчний “Улаан сумнууд”-ын үзүүлбэрээр ёслолын жагсаал өндөрлөсөн бөгөөд Лондоны тэнгэр дээгүүр орчин үеийн “F-35M Lightning”, “Typhoon” сөнөөгч онгоцууд болон II дайны үеийн “Lancaster” бөмбөгдөгч онгоц жагсан ниссэн нь олны анхаарлыг татав. Агаарын парадыг хааны гэр бүл Букингемийн ордны тагтаас үзжээ.

Үдээс хойш хаан болон хатан хаан Букингемийн ордонд дайны ахмадууд, тэдний гэр бүлийн төлөөлөгчдийг хүлээн авч уулзсан байна.

Их Британийн Үндэсний статистикийн газар болон түүхийн нийгэмлэгийн мэдээллээр 2024 оны байдлаар тус улсад Дэлхийн II дайнд оролцож явсан, 95-112 насны 70 мянга орчим хүн амьдарч байгаа ажээ.

Эх сурвалж: BBC