Хятадын баруун өмнөд нутгийн Гуйжоу мужийн Чянши хотын голд ням гарагт гэнэтийн хүчтэй салхи гарсны улмаас жуулчдын сууж явсан дөрвөн завь хөмөрч, ноцтой осол гарлаа. Уг завинууд Хятадын хөдөлмөрчдийн баярын долоо хоногийн амралтын сүүлийн өдөр аялж явсан бөгөөд ослын үеэр нийт 84 хүн усанд унасан байна.
Өнөөдөр нэг хүний цогцсыг олсноор амиа алдсан хүний тоо 10-д хүрчээ. Мөн 70 хүн эмнэлэгт хүргэгдэн эмчлүүлж байгаа бөгөөд аврах ажиллагаа үргэлжилж байна.
БНХАУ-ын дарга Ши Жиньпин энэ ослын дараа аврах ажиллагаанд бүх хүчээ дайчлахыг үүрэгдэж, аялал жуулчлалын оргил үеийн аюулгүй байдлыг хангахын тулд бүх шатны удирдлагуудыг хариуцлагаа өндөржүүлэхийг анхааруулжээ. Тэрбээр сүүлийн үед завь болон аяллын ослууд нэмэгдэж буйг онцолж, урьдчилан сэргийлэх арга хэмжээг чангатгах шаардлагатайг онцлон дурдсан байна.
Тус улс саяхан ч мөн аялал жуулчлалтай холбоотой ослуудтай тулгарсан. Хунань мужид зорчигч тээврийн завь үйлдвэрийн хөлөг онгоцтой мөргөлдөж 11 хүн амиа алдаж байсан бол зүүн нутгийн Сүжөү хотод аяллын нисдэг тэрэг осолдож, нэг хүний амь эрсдэж, дөрвөн хүн бэртсэн байна.
Эх сурвалж: BBC
