АНУ-ын Ерөнхийлөгч Дональд Трамп ням гарагт сэтгүүлчдэд мэдээлэл өгөх үеэрээ Хятад болон бусад орнуудтай шударга худалдааны хэлэлцээр байгуулах нь нэн тэргүүний зорилт гэдгийг онцлон тэмдэглэлээ.

Тэрбээр “Air Force One” онгоцонд өгсөн мэдэгдэлдээ, Хятадын дарга Ши Жиньпинтэй энэ долоо хоногт уулзах төлөвлөгөө байхгүй ч, АНУ-ын төлөөлөгчид Бээжингийн төлөөлөлтэй олон асуудлаар идэвхтэй хэлэлцэж байгаа гэлээ. Худалдааны хэлэлцээрийн талаар энэ долоо хоногт зарлах эсэх талаар асуухад тэр “магадлал өндөр” гэж хариулсан ч дэлгэрэнгүй мэдээлэл өгөөгүй байна.

Д.Трамп өнгөрсөн дөрөвдүгээр сарын 2-нд олон улсын худалдааны түншүүддээ 10 хувийн тариф ногдуулсан бөгөөд Хятад, Канад, Мексик зэрэг улсад ган, хөнгөн цагаан, автомашины экспортод 25 хувийн өндөр татвар, Хятадад бүр 145 хувийн татвар оноосон юм. Гэвч үүний дараа тарифын хэрэгжилтийг 90 хоногоор хойшлуулсан бөгөөд энэ хугацаанд хэлэлцээр хийх боломжийг эрэлхийлж байна. Хариу тариф долдугаар сарын 8-наас хэрэгжиж эхлэх эсэх нь одоогоор тодорхойгүй байна.

Ерөнхийлөгч Трамп “Хятад улс АНУ-г олон жилийн турш хохироосоор ирсэн” гэж шүүмжлээд, АНУ-ын ерөнхийлөгч асан Ричард Никсоны Хятадтай харилцаа тогтоох шийдвэрийг хамгийн муу шийдвэр байсан гэж нэрлэжээ.

Тэрбээр NBC News-д өгсөн ярилцлагын үеэр Хятадын тал тохиролцоонд хүрэхийг “маш ихээр хүсэж байна” гэж мэдэгдсэн бөгөөд АНУ “их наяд долларын худалдааны алдагдлыг зогсоож, одоо Хятадтай бизнес хийхгүй байгаа нь эерэг алхам” хэмээн онцолсон байна.

“Бид шударга хэлэлцээр хийх ёстой. Энэ бүхний үр дүнг харах л үлдлээ” гэж Ерөнхийлөгч Трамп мэдэгдсэн байна.

Эх сурвалж: Reuters