АНУ-ын Ерөнхийлөгч Дональд Трамп ням гарагт мэдэгдэл хийж, гадаадын улсад үйлдвэрлэсэн бүх кинонд 100 хувийн татвар ногдуулах үйл явцыг эхлүүлэх үүргийг Худалдааны яам болон АНУ-ын худалдааны хэлэлцээний төлөөлөгчдөд өгсөн байна.

Тэрбээр “Америкийн кино үйлдвэрлэл маш хурдан мөхөж байна. Бусад улс орон манай кино бүтээгчдийг татахын тулд урамшуулал санал болгож, Холливүүд болон киноны бусад салбар дампуурлын ирмэгт хүрлээ. Энэ бол улс орнуудын зохион байгуулалттай үйл ажиллагаа бөгөөд үүний улмаас үндэсний аюулгүй байдалд аюул учирч байна” хэмээн мэдэгдсэн байна.

Цаашлаад гадаадын улсаас АНУ-д орж ирж буй кинонууд үзэл суртал, мэдээллийн нөлөөлөл үзүүлж байгаа нь үндэсний соёлын аюулгүй байдалд сөргөөр нөлөөлж буйг тэрбээр онцолжээ.

Үүнээс өмнө, дөрөвдүгээр сарын 2-нд Трамп 185 улс, нутаг дэвсгэрээс АНУ-д нийлүүлж буй бүх бараанд татвар ногдуулна гэж мэдэгдсэн бөгөөд долоо хоногийн дараа уг шийдвэрийн хэрэгжих хугацааг 90 хоногоор хойшлуулж, энэ хооронд түр хугацаанд 10 хувийн тариф үйлчлэхээр болсон талаар Цагаан ордноос мэдээлж байсан.

Шинэ татварын бодлого нь зөвхөн кино салбарт бус олон улсын худалдааны нийт урсгалд ч нөлөөлж болзошгүйг шинжээчид анхааруулж байна.

Эх сурвалж: TASS, Цагаан ордон