Япон улсын Хүүхдийн баярт зориулан тавдугаар сарын 5-нд танилцуулсан албан ёсны статистикаар тус улсын 14 ба түүнээс доош насны хүүхдийн тоо 13.66 саяд хүрч, 44 дэх жилдээ дараалан буурсан байна. Энэ нь өнгөрсөн оныхоос 350 мянгаар багассан үзүүлэлт бөгөөд хүүхдийн эзлэх хувь ч мөн улсын нийт хүн амын 11.1 хувь болж, 51 дэх жилдээ тасралтгүй буурсан үзүүлэлттэй байна.

Хүүхдийн тоог хүйсээр нь авч үзвэл:

• Хөвгүүд: 6.99 сая

• Охид: 6.66 сая

Насны ангиллаар:

• 0–2 насны хүүхэд: 2.22 сая

• 12–14 насныхан: 3.14 сая

• Бусад насны хүүхдүүдийн тоо ч мөн тогтмол буурч байна.

Өнгөрсөн оны аравдугаар сарын байдлаар Окинава муж хүүхдийн эзлэх хувиар хамгийн өндөр буюу 15.8 хувьтай, араас нь Шига, Сага мужууд тус бүр 12.7 хувьтай жагссан байна. Харин хамгийн бага үзүүлэлттэй бүсүүдээр Акита (8.8%), Аомори (9.8%), Хоккайдо (9.9%) мужууд бичигджээ.

Хүүхдийн тоо, төрөлтийн түвшин тасралтгүй буурч буй энэхүү хандлага нь Японы хүн амын хөгшрөлт, хөдөлмөрийн хүчний хомсдол зэрэг томоохон нийгмийн сорилтыг улам бүр тодруулж байгааг шинжээчид онцолж байна.

Эх сурвалж: NHK, Японы Дотоод хэргийн яам