АНУ-ын гадаадын автомашин, авто сэлбэгт тогтоосон шинэ тарифын улмаас дэлхийн автомашины үйлдвэрлэл энэ онд хоёр хувиар буурч, нийт үйлдвэрлэлийн хэмжээ 87.9 сая нэгжид хүрэх төлөвтэй байгааг S&P Global Mobility компанийн дүгнэлтэд үндэслэн Nikkei Asia мэдээллээ.

АНУ-д 2024 онд автомашины борлуулалт гурван хувиар буурах таамгийг шинжээчид гаргажээ. Өмнөх жилүүдэд АНУ нь жилд дунджаар 16 сая автомашин борлуулдаг байсан бөгөөд энэ үзүүлэлт нь Хятадын дараа ордог дэлхийн хоёр дахь том зах зээл байв. Гэхдээ одоогийн байдлаар АНУ-д зарагдаж байгаа автомашины тал хувь нь импортынх, харин авто сэлбэгийн 30–60 хувийг мөн гадаадаас авдаг байна.

Тарифтай холбоотой хамгийн том өөрчлөлт нь дөрөвдүгээр сарын 3-наас хэрэгжиж эхэлсэн 25 хувийн татвар юм. Энэ татвар АНУ-д импортолж буй бүх автомашинд хамаарч байгаа бол тавдугаар сарын 3-наас эхлэн авто сэлбэг ч энэ тарифт багтах боллоо.

Гэхдээ АНУ-ын дотоодын авто үйлдвэрлэгчдийг хамгаалах зорилгоор хохирлын нөхвөр олгох зохицуулалтыг мөн багтаасан. Уг нөхвөр нь АНУ-д үйлдвэрлэсэн бүх автомашины үнийн 3.75 хувьтай тэнцэх хэмжээтэй бөгөөд зөвхөн энэ жилийн туршид үйлчлэх юм. Харин ирэх жилд уг нөхвөр 2.75 хувь болж буурч, гурав дахь жилээс цуцлагдах аж.

Ийнхүү АНУ-ын гаалийн тарифын бодлого нь зөвхөн дотоодын зах зээлд бус, дэлхийн автомашины үйлдвэрлэлд мэдэгдэхүйц сөрөг нөлөө үзүүлэх хандлагатай байгаа талаар олон улсын шинжээчид анхааруулж байна.

Эх сурвалж: Nikkei Asia, S&P Global Mobility