Өмнөд Солонгосын ерөнхийлөгчийн ээлжит бус сонгууль ирэх зургаадугаар сарын 3-нд болохтой холбогдуулан “Ардын хүч” намаас (АХН) Ким Мүн Сү намын сунгаанд ялалт байгуулж, ерөнхийлөгчийн сонгуульд нэр дэвшигчээр тодорлоо. Тэрбээр нийт 56.5 хувийн санал авч, 43.5 хувийн санал авсан намын дарга асан Хан Дон Хуныг илт давуу ялжээ.

Ким Мүн Сү өмнөх ерөнхийлөгч Юн Сог Ёль онц байдал зарласны улмаас огцорсны дараах нөхөн сонгуулиар Ардчилсан намаас (АН) нэр дэвшигч Ли Жэ Мёнтой шууд өрсөлдөхөөр болж байна.

Гэсэн ч АХН дотроос нэр дэвшигч тодорсон ч улс төрийн өрсөлдөөн бүрэн дуусаагүй байж магадгүй байна. Учир нь Ерөнхий сайд асан Хан Док Сү баасан гарагт сонгуульд нэрээ дэвшүүлэхээ мэдэгдсэн юм. Тэрбээр намд хамааралгүй боловч Ардчилсан намын Ли Жэ Мёныг дэмждэггүй барууны сонгогчдыг нэгтгэх боломжтой гэсэн хүлээлт бий.

Ким Мүн Сү энэ талаар нээлттэй байр суурь илэрхийлж, Хан Док Сүтэй хамтран ажиллахад бэлэн байгаагаа илтгэв. Харин Хан Дон Хун түүнийг намын сунгаанд оролцохгүйгээр нэр дэвших гэж оролдлоо хэмээн шүүмжилжээ.

Энэхүү нөхөн сонгууль нь Өмнөд Солонгосын улс төрд хүчний харьцааг өөрчлөх томоохон сорил болох төлөвтэй байна.

Эх сурвалж: Yonhap