НҮБ-ын Ерөнхий нарийн бичгийн дарга Антонио Гутерриш мягмар гарагт Энэтхэг, Пакистаны удирдагчидтай тус тус утсаар ярьж, хоёр орны хооронд үүсээд буй хурцадмал байдлын талаар санаа зовниж буйгаа илэрхийллээ. Тэрээр Пакистаны Ерөнхий сайд Шехбаз Шариф, Энэтхэгийн Гадаад хэргийн сайд Субраманьям Жайшанкар нартай холбогдон, цаашид мөргөлдөөнд хүргэж болзошгүй нөхцөл байдлаас зайлсхийхийг уриалсан байна.

НҮБ-ын хэвлэлийн төлөөлөгч Стефан Дюжаррикийн мэдэгдсэнээр, А.Гутерриш энэ нөхцөл байдал нь зөвхөн хоёр улсад төдийгүй дэлхий дахинд ноцтой үр дагавар авчрах эрсдэлтэйг онцолж, аль аль тал хүлээцтэй хандах шаардлагатайг тэмдэглэсэн байна.

Пакистаны Ерөнхий сайд Ш.Шариф НҮБ-ын Ерөнхий нарийн бичгийн даргад хандаж, Энэтхэгт хүлээцтэй байж, өдөөн хатгалгаас зайлсхийхийг зөвлөн хэлж өгөхийг хүссэн байна. Тэрээр “Пакистан энх тайвныг эрхэмлэж байгаа ч тусгаар тогтнолоо хамгаалахад бэлэн” гэдгийг X (хуучнаар Твиттер) хуудсаараа дамжуулан мэдэгдсэн байна.

Харин Энэтхэгийн талын төлөөлөл С.Жайшанкар НҮБ-ын уриалгыг хүндэтгэн хүлээн авч байгаагаа илэрхийлээд, Энэтхэгт болсон халдлагыг зохион байгуулагчид болон тэдний дэмжигчдийг шударга ёсны өмнө хариуцлага хүлээлгэх шийдвэр гаргаснаа мэдэгджээ.

Цөмийн зэвсэгтэй хоёр хөршийн хоорондох хурцадмал байдал олон улсын анхаарлыг татаж, хямрал даамжрах нь дэлхий нийтэд сөрөг нөлөө үзүүлэх магадлалтайг ажиглагчид анхааруулж байна.

Эх сурвалж: DW