Бөө Жон Сон Бэтэй холбоотой сэжиг бүхий мэдээлэлтэй холбогдуулан Өмнөд Солонгосын Ерөнхийлөгч асан Юн Сог Ёлийн гэрт прокурорууд өнөөдөр нэгжлэг хийжээ. Сэжиглэгдэж буй асуудал нь Юн Сог Ёль болон түүний эхнэр Ким Кен Хи нар бөөтэй харилцаатай байж болзошгүй, түүнд үнэтэй бэлэг дамжуулсан гэх мэдээлэлтэй холбоотой байна.
Сөүлийн өмнөд дүүргийн Прокурорын газрын мэдэгдсэнээр, “Жён Жин” нэрээр олон нийтэд танигдсан бөө Жон Сон Бэтэй холбогдож магадгүй нотлох баримтыг цуглуулах зорилгоор тус дүүрэг дэх Юн Сог Ёлийн хувийн орон сууцанд прокурорууд, мөрдөн байцаагчдын хамт нэгжлэг хийсэн ажээ.
Мөрдөн шалгалтын хүрээнд Ерөнхийлөгчөөр сонгогдсоных нь дараа Эв нэгдлийн сүмийн удирдлагууд Жён бөөд очир эрдэнийн хүзүүний зүүлт, үнэтэй цүнх бэлэглэсэн бөгөөд улмаар энэ бэлэг нь тэргүүн хатагтай асан Ким Кен Хи-гийн гар дамжсан байж болзошгүй гэх мэдээллийг баталгаажуулахыг зорьж байна. Түүнчлэн Жёнд эдгээр бэлэг үнэхээр хүргэгдсэн эсэх, Ким Кен Хи ямар нэгэн байдлаар оролцсон эсэхийг шалгаж байгаа юм.
Энэхүү хэрэг улс төрийн шинж чанартай дуулиан үүсгэж, хууль хяналтын байгууллагын анхаарлын төвд байна.
Эх сурвалж: Yonhap
