АНУ-ын Ерөнхийлөгч Дональд Трамп үүрэгт ажилдаа орсноос хойш 100 хоногийн хугацаа өнгөрснийг тохиолдуулан Мичиган мужийн Детройт хотноо сонгуулийн сурталчилгааны шинжтэй үг хэлж, хийсэн ажлуудаа танилцуулан, улс төрийн өрсөлдөгчдөө хатуу шүүмжиллээ.

Тэрбээр ерөнхийлөгчийн албан тушаалыг "гүн гүнзгий өөрчлөлт хийх" хэрэгсэл болгон ашиглаж байгаагаа онцлон дурдсан бөгөөд Ардчилсан намаас сонгогдсон өмнөх Ерөнхийлөгч Жо Байден, Холбооны нөөцийн сангийн тэргүүнийг илтгээрээ шүүмжилжээ. Мөн өөрийн нэр хүнд буурч буйг харуулсан санал асуулгын дүнг “хуурамч” хэмээн няцаасан байна.

Трамп цагаачлалын эсрэг бодлогоороо ололттой ажиллаж буйгаа онцолж, өмнөд хил дээрх зөрчлийн тоо 140 мянгаас 7000 гаруй болж эрс буурсныг дурджээ. Мөн түүний засаг захиргаа 65 700 хууль бус цагаачийг албадан гаргасан гэж Цагаан ордноос мэдээлсэн ч энэ нь өнгөрсөн жилийнхтэй харьцуулахад буурсан үзүүлэлт аж.

Худалдааны дайны нөлөө эдийн засагт сөргөөр тусах эрсдэлтэй ч Трамп гадаадын авто машин, сэлбэг хэрэгслийн импортын татварыг зөөлрүүлэх замаар АНУ-ын автомашины үйлдвэрлэлийн салбарыг дэмжихээ илэрхийлсэн байна. Үүний хажуугаар тэрбээр өндөгний үнэ 87 хувиар буурсан гэж мэдэгдсэн ч уг тоо нь засгийн газрын албан ёсны статистиктай зөрж байгаа аж.

“Gallup” судалгааны төвийн мэдээлснээр, Д.Трамп нь Дэлхийн Хоёрдугаар дайнаас хойших АНУ-ын ерөнхийлөгчдөөс 100 хоногийн дараах байдлаар 50-иас доош хувьтай үнэлгээ авсан цорын ганц хүн болж, 44 хувийн дэмжлэгтэй байгааг харуулжээ. Гэсэн ч Бүгд найрамдах намын дэмжигчдийн дунд нэр хүнд нь өндөр хэвээр байгаа бол Ардчилсан намын нэр хүнд ч мөн сул хэвээр байна.

Эх сурвалж: BBC