“SpaceX”-ийн “Starlink” интернэт үйлчилгээтэй өрсөлдөх зорилготой “Kuiper” төслийн хүрээнд Amazon компани анхны 27 хиймэл дагуулыг сансарт хөөргөлөө. Энэхүү хөөргөлт даваа гарагт, орон нутгийн цагаар 19:00 цагт АНУ-ын Флорида муж улсын Канаверал хошуун дахь сансрын хөлгийн буудлаас “United Launch Alliance” (ULA) компанийн “Atlas V” зөөгч пуужингаар амжилттай хийгдсэн байна.
Amazon ирэх жилүүдэд нийт 3236 хиймэл дагуулыг дэлхийн нам тойрог замд (590-630 км-ийн өндөрт) гаргахаар төлөвлөж байгаа бөгөөд эдгээр дагуулууд нэг секундэд 400 мегабит хүртэлх хурдтай өргөн зурвасын интернэт үйлчилгээг үзүүлэх юм. Цаашид 1 Гбит/с ба түүнээс дээш хурд хүргэх боломжтой болохыг мөн онцолжээ.
"Project Kuiper" төсөл нь дижитал тэгш бус байдлыг бууруулах, интернэт сүлжээнд холбогдох боломж муутай бүс нутгуудад хямд өртөгтэй, хурдан интернэт үйлчилгээ үзүүлэх зорилготой юм. Amazon компани өнгөрсөн 2023 онд хэрэглэгчийн терминалын туршилтын загваруудыг танилцуулж, мөн "KuiperSat-1", "KuiperSat-2" туршилтын хиймэл дагуулуудыг тойрог замд хөөргөсөн билээ.
Ингэснээр Amazon хиймэл дагуулын интернэтийн үйлчилгээний зах зээлд "Starlink" болон бусад операторуудтай албан ёсоор өрсөлдөж эхэллээ. Харин "SpaceX" компани анхны хиймэл дагуулуудаа 2019 онд хөөргөж, өнөөг хүртэл 6750 гаруй хиймэл дагуулыг тойрог замд гаргасан бөгөөд дэлхий даяар 5 сая гаруй хэрэглэгчтэй болоод байна.
Эх сурвалж: BBC
