АНУ-ын Ерөнхийлөгч Дональд Трампын ногдуулсан татварын эсрэг авч буй хариу арга хэмжээний хүрээнд Хятад улс захиалсан онгоцуудаа буцааж байна гэж нисэх онгоц үйлдвэрлэгч Boeing компанийн гүйцэтгэх захирал Келли Ортберг мэдэгджээ.

Түүний хэлснээр, хоёр улсын худалдааны маргаан хурцадсаны дараа хоёр онгоцыг хэдийн буцаасан бөгөөд цаашид бусад онгоцуудыг буцаах төлөвтэй байгаа ажээ. Мөн энэ онд Хятадад дахин 50 онгоц нийлүүлэхээр төлөвлөж байсан боловч худалдан авагчид тэдгээрийг хүлээж авахгүй гэдгээ мэдэгдсэн байна.

Америкийн тал Хятадаас импортлох бараа бүтээгдэхүүнд 145 хувийн татвар ногдуулаад байгаа бол хариуд нь Хятадын тал АНУ-ын бараанд 125 хувийн татвар ногдуулаад байгаа юм.

Мягмар гаригт Зууван танхимд үг хэлэх үеэрээ Д.Трамп Хятадтай худалдааны харилцаагаа сайжруулах талаар өөдрөг бодолтой байгаагаа илэрхийлээд, түүний ногдуулсан татварын хэмжээ “ихээхэн буурна, гэхдээ тэг болохгүй” гэж мэдэгджээ. 

Харин К.Ортбергийн хэлснээр, Хятадын тал тарифаас шалтгаалан онгоцны нийлүүлэлтийг зогсоосон байна. Boeing бол Америкийн хамгийн том нисэх онгоц экспортлогч бөгөөд үйлдвэрлэж буй онгоцнуудынхаа 70 орчим хувийг гадаадын зах зээлд борлуулдаг ажээ.   

Бусад агаарын тээврийн компанийн захиалга их байгаа тул Boeing компани хэдийн үйлдвэрлэсэн 41 онгоцыг бусад хэрэглэгчдэд дахин борлуулах хувилбарыг судалж байна гэж К.Ортберг хэлжээ. Харин үлдсэн есөн онгоцыг хараахан үйлдвэрлэж эхлээгүй байгааг тэрбээр дурдаад, Хятадын талын санаа бодлыг ойлгохыг хичээж байна, шаардлагатай бол онгоцуудыг өөр хэрэглэгчдэд нийлүүлэх боломжтой хэмээн нэмж хэлжээ.

BBC