Турк улсын засгийн газраас Курдийн Ажилчны Намыг (КАН) албан ёсоор тараах шийдвэрийг энэ оны дөрөвдүгээр сарын сүүлчээр гаргахаар төлөвлөж буй талаар тус улсын засгийн газрыг дэмжигч Hürriyet сонин мэдээллээ. Тус намыг Туркт олон жилийн турш хориглож, террорист байгууллагуудын жагсаалтад оруулсан билээ.

Эрх баригч Шударга ёс ба хөгжлийн намын төлөөлөгч Омер Челик хэвлэлд өгсөн ярилцлагадаа, олон жилийн турш үргэлжилсэн курдүүдийн асуудалд тодорхой ахиц энэ сард гарч болзошгүйг дурдсан. Мөн курдүүдийн талыг баримтлагч DEM намын төлөөлөгчид дөрөвдүгээр сарын 22-нд тус намын удирдагч, бүх насаараа хоригдож буй Абдулла Өжалантай уулзсан тухай мэдээлжээ.

Сонины тоймч Абдюлькадир Сельвигийн бичснээр, Туркийн Ерөнхийлөгч Режеп Тайип Эрдоган КАН-ыг тараах шийдвэр гаргах төлөвтэй байгаа талаар эрх баригч хүрээнд мэдээлэл тархаад байгаа аж. Энэ нь өнгөрсөн хугацаанд ховор тохиолдож байсан дипломат алхамд тооцогдож байна.

КАН нь гол үйл ажиллагаагаа Иракийн Сүлеймания хотод төвлөрүүлдэг бөгөөд тус намын ээлжит их хурал тавдугаар сарын 5-нд болох бөгөөд энэ үеэр намыг тараах асуудлыг албан ёсоор хэлэлцэхээр төлөвлөжээ. Sözcü сонинд дурдсанаар, зэвсгээ хураах, татан буулгах үйл явцыг зургаадугаар сард дуусгахаар ажиллаж байгаа аж.

Абдулла Өжалан хоёрдугаар сард зэвсэгт бүлэглэлүүдэд хандан зэвсгээ хураалгах, Турктэй зөрчилдөөнөө зогсоох, КАН-ыг тараах уриалга гаргасан. Үүний хариуд нам гуравдугаар сарын 1-нд гал зогсоохоо зарлаж, тарах бэлтгэлээ хангаж байгаагаа мэдэгдсэн байна.

Туркийн эрх баригчид КАН-ыг 1984 оноос хойш үндэсний аюулгүй байдалд заналхийлж буй гэж үзэн, дотооддоо болон Ирак, Сирийн хойд хэсэгт зэвсэгт ажиллагаа явуулсаар ирсэн юм.

Эх сурвалж: TASS, Hürriyet, Sözcü.