Оросын Ерөнхийлөгч Владимир Путин Украины Ерөнхийлөгч Володимир Зеленскийн дэвшүүлсэн саналыг судлах боломжтой хэмээн мэдэгдэж, хоёр улсын хооронд шууд хэлэлцээ хийх боломжийг үгүйсгэсэнгүй. Зеленский Москвагийн иргэний дэд бүтцэд чиглэсэн цохилтуудыг 30 хоногийн хугацаанд зогсоох саналыг тавьсан юм.

Путин энэ тухайд “Саналыг сайтар судлах шаардлагатай. Магадгүй хоёр талын хүрээнд ярилцаж болох юм” хэмээн байр сууриа илэрхийлжээ.

Гэсэн ч Оросын удирдагч Сумы мужид дөрөвдүгээр сарын 13-нд болсон пуужингийн цохилтыг зөвтгөж, Украины тал иргэний байгууламжийг цэргийн зориулалтаар ашигласан хэмээн мэдэгдэв. Тэрбээр "Сумы дахь конгрессын төв нь иргэний объект хэдий ч, тэнд Курск мужид гэмт хэрэг үйлдсэн хүмүүст шагнал гардуулж байсан учраас цохилт өгөхөөс өөр аргагүй байсан" гэж тайлбарлажээ. Энэ цохилтоор 35 хүн амиа алдсан бөгөөд Путин үүнийг "зүй ёсны шийтгэл" гэж нэрлэсэн байна.

Оросын цэргийн цохилтын дараа Сумы мужийн захирагч В.Артюх тус төвд цэргүүдийг шагнах ажиллагаа болох гэж байсан гэдгийг баталсан бөгөөд маргааш нь Ерөнхийлөгч Зеленский түүнийг албан тушаалаас чөлөөлсөн байна.

Оросын тал дөрөвдүгээр сарын 19-нд Улаан өндөгний баярын үеэр гал зогсоох 30 цагийн шийдвэр гаргасан. Энэ шийдвэр нь дөрөвдүгээр сарын 19-ний 18:00 цагаас 21-ний 00:00 цаг хүртэл хүчин төгөлдөр байсан бөгөөд энэ хугацаанд бүх байлдааны ажиллагааг зогсоох тушаал цэргүүдэд өгөгдсөн гэж Кремль мэдээлжээ.

Харин Украины тал Оросын эвлэрлийг 2000 гаруй удаа зөрчсөн хэмээн мэдэгдэж, Зэвсэгт хүчний ерөнхий командлагч А.Сырскийн илтгэлийг иш татжээ. Гэсэн ч дөрөвдүгээр сарын 20-ны өдөр агаарын түгшүүр огт дуугараагүй гэдгийг мөн тэмдэглэсэн байна.

Орос ч Украины Зэвсэгт хүчнийг эвлэрлийг зөрчсөн гэж буруутгасан бөгөөд энэ нь хоёр талын хоорондын итгэлцэл дахин сул байгааг харуулж байна.

Эх сурвалж: DW, Интерфакс, Кремлийн хэвлэлийн алба