Өнөөдөр дэлхий даяар “Олон улсын эх дэлхийн өдөр”-ийг тэмдэглэж байна. Энэ жилийн уриа нь “Бидний хүч, бидний гараг” бөгөөд хүн төрөлхтөн байгаль орчноо хамгаалах, нөхөн сэргээх үйлсэд өдөр тутамдаа оролцохын чухлыг онцолж буй юм.

Эх дэлхийн өдөр нь байгаль орчин, тогтвортой хөгжил, уур амьсгалын өөрчлөлт, зэрлэг амьтдын мөхөл зэрэг оршин тогтнолын тулгамдсан асуудалд хүн бүрийн анхаарлыг хандуулах зорилготой. Энэ өдөр 1970 онд АНУ-ын сенатор Гэйлорд Нелсоны санаачилгаар анх тэмдэглэгдсэн бөгөөд тухайн үед 20 сая хүн нэгдэн оролцсон бол өнөөдөр дэлхийн 192 орон, нэг тэрбум гаруй хүн байгаль дэлхийдээ анхаарал хандуулж, хамгаалах үүргээ ухамсарлан тэмдэглэж байна.

Энэ жил тус өдөр тэмдэглэгдэж эхэлсний 55 жилийн ой тохиож буй бөгөөд дэлхий дахинд дараах үйлдлүүдийг дэмжихийг уриалж байна:

• Мод тарих, ногоон байгууламж нэмэгдүүлэх

• Хог хаягдлыг багасгах, дахин боловсруулах

• Байгальд ээлтэй бүтээгдэхүүн, үйлчилгээг сонгох

• Эрчим хүчний хэмнэлттэй хэрэглээ, сэргээгдэх эрчим хүчийг дэмжих

Монгол Улсад ч байгаль орчныг хамгаалах чиглэлээр олон санаачилга өрнөж байна. Жишээлбэл, Их Британийн Элчин сайдын яам цоохор ирвэсийг хамгаалах ажилд дэмжлэг үзүүлж, сэргээгдэх эрчим хүч болон байгаль хамгааллын талаар олон нийтэд уриалга гаргасан байна. Тэд X платформоор дамжуулан иргэдийг уур амьсгалын өөрчлөлттэй тэмцэх үйлсэд хувь нэмрээ оруулахыг уриалжээ.

Эх дэлхийг хамгаалах хүч, өөрчлөлт хийх эхлэл хүн бүрийн ухамсар, үйлдлээс эхэлдэг гэдгийг энэ өдөр дахин сануулж байна.

Эх сурвалж: EarthDay.org, Их Британийн ЭСЯ