Ерөнхийлөгч Д.Трампын засаг захиргаанаас худалдааны салбарт Хятадад үзүүлж буй шахалтаа улам чангатгаж, Америкийн боомтуудад ирж зогсож буй Хятадын хөлөг онгоцуудаас авах хураамжийг нэмэгдүүлжээ.
АНУ-ын засгийн газрын агентлаг болох Худалдааны төлөөлөгчийн газраас энэ талаарх мэдэгдлийг пүрэв гарагт гаргасан байна. Энэ нь Хятадын давамгайлал бий болсон энэ үед Америкийн хөлөг онгоцны үйлдвэрлэлийн салбарыг сэргээхэд чиглэсэн төлөвлөгөөний хүрээнд авч буй арга хэмжээ юм.
Энэхүү арга хэмжээ нь Хятадын далбаатай болон Хятадад үйлдвэрлэсэн хөлөг онгоцнуудын эзэд, оператор компаниудад хамаарах ажээ. Нэмэгдүүлсэн хураамжийг 6 сарын дараа авч эхлэх бөгөөд цаашид үе шаттайгаар өсгөнө. Хураамжийн хэмжээ нь ачааны цэвэр жин ба чингэлгүүдийн тооноос хамаарна.
Энэ шийдвэрийг гаргахдаа Худалдааны тухай хуулийн 301 дүгээр заалтад үндэслэсэн бөгөөд худалдааны түншүүдийн зүгээс шударга бус үйлдэл гаргасан тохиолдолд дээрх арга хэмжээг авахыг уг заалтын дагуу зөвшөөрдөг байна.
Худалдааны төлөөлөгчийн газрын тэргүүн Жеймисон Грир мэдэгдэхдээ, энэхүү шийдвэр нь Хятадын давамгайлалтай тэмцэх эхлэлийг тавьсан бөгөөд Америкийн нийлүүлэлтийн сүлжээнд учирч буй аюулыг арилгах, АНУ-д үйлдвэрлэсэн хөлөг онгоцуудын эрэлтийг нэмэгдүүлэх дохио болно гэлээ.
Харин түүний энэ мэдэгдэл Хятадын талын эрс дургүйцлийг хүргэжээ. Баасан гарагт БНХАУ-ын ГХЯ-ны төлөөлөгч Лин Цян мэдэгдэхдээ, энэхүү арга хэмжээ нь бусад улсад төдийгүй АНУ-д өөрт нь сөрөг үр дагавартай гэдгийг дурдсан байна. Үүний уршгаар далайн тээврийн өртөг нэмэгдэж, дэлхийг хамарсан нийлүүлэлтийн сүлжээ доголдоно гэдгийг тэрбээр тэмдэглэн хэллээ.
NHK
“Олон талын тохиролцоонд үндэслэсэн дүрэм журмыг хүндэтгэхийг Вашингтонд уриалахын сацуу өөрийн хууль ёсны ашиг сонирхлыг хамгаалахын тулд Хятадын тал шаардлагатай бүх арга хэмжээг авна” гэж Хятадын ГХЯ-ны төлөөлөгч мэдэгджээ.
